Էրդողանի խոսնակը Թուրքիայում մոլեգնող հրդեհը որակել է որպես ազգային աղետ
Թուրքիայի նախագահի խոսնակ Իբրահիմ Քալընն Անթալիայում մոլեգնող զանգվածային հրդեհը որակել է որպես ազգային աղետ:
Քալինը Թվիթերում գրել է. «Անտառային հրդեհները ազգային աղետ են: Մեր բոլոր նախարարությունները ողջ ուժով պայքարում են դրա դեմ»:
Ռեջեփ Թայիբ Էրդողանի խոսնակը հավելել է. «Դատախազությունը բազմակողմանի հետաքննություն է սկսել՝ հրդեհների պատճառները հայտնաբերելու նպատակով: Հրդեհի մարմանն ուղղված ջանքերը շարունակվելու են»:
Թուրքիայի Անթալիա քաղաքի հարավային շրջանների անտառներում բռնկված անտառային հրդեհների պատճառով, չորեքշաբթի կեսօրին, տարածքի բնակիչները տարհանվել են:
Վերջին երկու օրվա ընթացքում, Թուրքիայի տասներեք նահանգներում ընդհանուր առմամբ գրանցվել է 41 հրդեհ, որոնցից 31-ն այս պահին վերահսկելի են: Մինչ այժմ հրդեհների հետևանքով զոհվել է 3, վիրավորվել՝ 122 մարդ: