İrana qarşı təcavüz regionda böhrana səbəb olub

Pakistanın Baş naziri Şanxay Əməkdaşlıq Təşkilatının dövlət başçılarının sammitində bildirib: “Bu ilin əvvəlində təşkilatın üzvü olan İran İslam Respublikasının ərazi bütövlüyünün pozulması regionda böyük böhrana səbəb oldu. Biz bir daha vurğulayırıq ki, yeganə çıxış yolu diplomatiyadır.”

“Pars Today”in verdiyi xəbərə görə, Pakistanın Baş naziri Şahbaz Şərif çərşənbə axşamı Qırğızıstanın paytaxtı Bişkekdə keçirilən Şanxay Əməkdaşlıq Təşkilatına üzv ölkələrin dövlət başçılarının sammitində çıxış edib.

Şahbaz Şərif bildirib ki, Şanxay Əməkdaşlıq Təşkilatının üzvü olan İran İslam Respublikası bu ilin əvvəlində hücuma məruz qalıb və onun suverenliyi və ərazi bütövlüyü pozulub. Onun sözlərinə görə, bu hadisə regionda böyük böhranın yaranmasına səbəb olub.

Pakistanın Baş naziri qeyd edib ki, regiondakı bu böyük böhran nəticəsində nəqliyyat marşrutlarının bloklanması qlobal iqtisadi və sosial həyata ciddi təsir göstərib və bir çox ölkə, xüsusilə Pakistan bunun mənfi nəticələri ilə üzləşir.

Şahbaz Şərif vurğulayıb ki, Pakistan qətiyyətlə sülhün tərəfdarıdır və vasitəçilik və səmimi şəkildə asanlaşdırıcılıq missiyasını davam etdirəcək.

Baş nazir bildirib ki, diplomatiya böhrandan çıxış üçün yeganə davamlı yoldur və İslamabad Anlaşma Memorandumunun həyata keçirilməsinin sülh və sabitliyin təmin olunmasına böyük töhfə verəcəyini vurğulayıb.

Pakistan, Səudiyyə Ərəbistanı və Türkiyə arasında imzalanmış birgə müdafiə paktına da toxunan Şahbaz Şərif bildirib ki, bu saziş mahiyyət etibarilə müdafiə xarakterlidir, heç bir ölkəyə qarşı yönəlməyib və qarşıdurma və ya parçalanma məqsədi daşımır.

Pakistanın Baş naziri Qəzza və İordan çayının qərb sahilində vəziyyətin daha da pisləşməsi ilə bağlı dərin narahatlığını ifadə edərək, fələstinlilərə qarşı müharibənin dayandırılmasına çağırıb və beynəlxalq ictimaiyyətdən Fələstin xalqına yardım göstərilməsi ilə bağlı öhdəliklərinə sadiq qalmağı tələb edib.