ՀՀ և ԱՄՆ պաշտոնյաները մեկնել են Սյունիք. «ԹՐԻՓՓ Հայաստան» էջի առաջին հաղորդագրությունը
«Թրամփի ուղի՝ հանուն միջազգային խաղաղության և բարեկեցության» (ԹՐԻՓՓ) ծրագրի շրջանակում կազմակերպվել է ՀՀ և ԱՄՆ պաշտոնյաների մասնակցությամբ համատեղ այց դեպի Սյունիք։ Լուրը հրապարակվել է «ԹՐԻՓՓ Հայաստան / TRIPP Armenia» ֆեյսբուքյան էջում։
«Հայկական կողմից մասնակցում են ՀՀ ԱԳՆ ներկայացուցիչները, իսկ ամերիկյան կողմից՝ Հայաստանում ԱՄՆ գործերի ժամանակավոր հավատարմատար Դեյվիդ Ալենը և ԱՄՆ պետքարտուղարության քաղաքականության պլանավորման հարցերով ավագ խորհրդական Ջոն Ասքոնասը»,– ասված է էջում հրապարակված առաջին գրառման մեջ։
Նշվում է, որ պաշտոնյաները նախատեսում են հանդիպել տեղական ինքնակառավարման մարմինների ներկայացուցիչների և համայնքների բնակիչների հետ։ Քննարկումների ընթացքում անդրադարձ է կատարվելու ԹՐԻՓՓ-ի միջոցով տարածաշրջանային փոխկապակցվածության ամրապնդմանը և նոր հնարավորությունների ստեղծմանը։
Նախատեսվում է նաև այցելություն Մեղրիի մոտակայքում ԹՐԻՓՓ երթուղու համար նախատեսվող վայրեր։
Նշենք, որ Իրանը բազմիցս հայտարարել է, որ միջազգային սահմանների ցանկացած փոփոխություն կամ Իրանի և Հայաստանի միջև ցամաքային կապերի արգելափակում Թեհրանի կարմիր գիծն է, և որ տարածաշրջանի կոլեկտիվ անվտանգությունը պետք է հիմնված լինի դաշտային իրողությունների և պատմական սահմանների պահպանման վրա։
ՀՀ վարչապետ Նիկոլ Փաշինյանն ու Ադրբեջանի նախագահ Իլհամ Ալիևը 2025 թվականի օգոստոսի 8-ին Վաշինգտոնում ստորագրեցին 7 կետից բաղկացած համատեղ հռչակագիր, որով նախատեսվում է Հայաստանի հարավային հատվածով (Սյունիքի մարզ) ռազմավարական տարանցիկ ճանապարհ ստեղծել, որը կկոչվի «Թրամփի ուղի» (TRIPP) և Ադրբեջանին առևտրային հասանելիություն կապահովի դեպի Նախիջևան:
