مالیزیا: د صهیونیسټي رژیم له خوا د مسجد الاقصی یهودي کول یو شرموونکی اقدام دی

پارس ټوډې – د مالیزیا د بهرنیو چارو وزارت په یوه خبرپاڼه کې ویلي چې د مسجد الاقصی د یهودي کولو لپاره د صهیونیسټي رژیم هڅې، یو شرموونکی اقدام او د دې سپېڅلي ځای د حرمت ښکاره سپکاوی دی.

د پارس ټوډې د راپور له مخې؛ د مالیزیا د بهرنیو چارو وزارت په خپره کړې خبرپاڼه کې د اشغالګر رژیم د پولیسو تر ملاتړ لاندې پر مسجد الاقصی د صهیونیسټي افراطیانو یرغل وغانده.

په خبرپاڼه کې راغلي چې د افراطي مېشتو صهیونیسټانو دغه کړنې د مسجد الاقصی د کلتوري، تاریخي او اصلي هویت د بدلون لپاره هڅې ګڼل کېږي.

د مالیزیا د بهرنیو چارو وزارت همدارنګه ټینګار وکړ چې دا ډول اقدامات او چلندونه پاروونکي او د نه منلو وړ دي.

یاد وزارت زیاته کړه چې نړیواله ټولنه باید د صهیونیسټي رژیم د دښمنانه او پاروونکو کړنو پر وړاندې چوپه خوله پاتې نه شي.