Lajme | Rusia: ANEA dhe Irani munden të arrijnë marrëveshje / Refuzohet në Amerikë rezoluta që ndalon sulmin ndaj Venezuelës

Pars Today - Ministri i Punëve të Jashtme të Rusisë tha: “Nëse Agjencia Ndërkombëtare e Energjisë Atomike ndjek parimet dhe detyrat e saj dhe nuk u nënshtrohet presioneve perëndimore, ajo mund të arrijë marrëveshje me Iranin.”

Sipas Pars Today, Ministri i Punëve të Jashtme të Rusisë, Sergey Lavrov, të mërkurën, pas bisedimeve me Ministrin e Punëve të Jashtme të Iranit, Seyed Abbas Araghchi, në një konferencë për shtyp në Moskë tha: “Duhet të kemi parasysh se Agjencia Ndërkombëtare e Energjisë Atomike nuk e ka shprehur ende qëndrimin e vet në lidhje me faktin se objektet nën mbikëqyrjen e saj në Iran u janë nënshtruar sulmeve më të rënda të paligjshme.”

Ai vazhdoi: “Ne e vlerësojmë vullnetin e mirë të Republikës Islamike, e cila, pavarësisht të gjitha këtyre sulmeve, është e gatshme të bashkëpunojë me Agjencinë Ndërkombëtare të Energjisë Atomike. Por ky bashkëpunim nuk duhet të jetë në interes të avancimit të axhendës perëndimore. Nuk kam dyshim se nëse udhëheqja e Agjencisë Ndërkombëtare të Energjisë Atomike i përmbush plotësisht detyrat e veta, mund të arrihen marrëveshje me Republikën Islamike.”

Rezoluta për të parandaluar sulmin ndaj Venezuelës nuk merr vota në Dhomën e Përfaqësuesve të SHBA-së

Republikanët e Dhomës së Përfaqësuesve të SHBA-së hodhën poshtë të mërkurën dy rezoluta të mbështetura nga demokratët, rezoluta të cilat do të kufizonin fuqinë e presidentit amerikan Donald Trump për të përdorur forcë ushtarake kundër karteleve të lëndëve narkotike dhe Venezuelës.

Votimi ndodhi ndërsa presidenti i SHBA-së, Donald Trump, ka shtuar kërcënimet e tij kundër Venezuelës, shtetit të Amerikës së Jugut, dhe Kongresi ka vënë në pikëpyetje mënyrën se si është kryer operacioni që çoi në shkatërrimin e 26 anijeve të dyshuara për trafik droge dhe vdekjen e të paktën 99 personave.

Presidentja meksikane: Ndaloni gjakderdhjen në Venezuelë!

Presidentja meksikane, Claudia Sheinbaum, i bëri thirrje të mërkurën Organizatës së Kombeve të Bashkuara të parandalojnë çdolloj gjakderdhjeje në Venezuelë. Sheinbaum tha: “Ne i themi "Jo!" ndërhyrjes së huaj dhe mbështesim zgjidhjen paqësore të konflikteve dhe dialogun për paqen. I bëjmë thirrje Organizatës së Kombeve të Bashkuara të luajë rolin e vet, të cilin nuk e kemi parë deri tani, në parandalimin e çdolloj gjakderdhjeje dhe sigurimin e ndjekjes së vazhdueshme të zgjidhjeve paqësore për konfliktet. Ky është qëndrimi ynë.”

Sulm artilerie i ushtrisë së regjimit izraelit në jug të Libanit

Në vijim të shkeljeve të përsëritura të armëpushimit, të mërkurën në mbrëmje, ushtria e regjimit sionist shënjestroi me artilerinë e saj zonat midis dy fshatrave Ramyeh dhe Marwahin në jug të Libanit. Nuk janë publikuar detaje të mëtejshme në lidhje me sulmet e artilerisë së ushtrisë së regjimit sionist në zonat midis dy fshatrave Ramyeh dhe Marwahin në jug të Libanit. Sulmi erdhi në një kohë kur, gjatë ditëve të fundit, kufijtë jugorë të Libanit kanë parë intensifikime të shkëmbimeve të zjarrit midis ushtrisë së regjimit sionist dhe forcave të Rezistencës.

17 palestinezë vdesin nga i ftohti

Mbrojtja Civile e Gazës, duke vënë në dukje se 17 palestinezë, përfshirë katër fëmijë, vdiqën nga i ftohti në dhjetor, paralajmëroi se vala e fortë e të ftohtit, në mungesë të hapësirave të strehimit dhe mjeteve të ngrohjes, po kërcënon jetën e mijëra fëmijëve të pastrehë në Gaza.