Viongozi wa Jumuiya ya Shanghai walaani vikali vita vya Marekani na Israel dhidi ya Iran

Wakuu wa nchi wanachama wa Jumuiya ya Ushirikiano ya Shanghai (SCO) wamelaani vikali vita vya kichokozi vya Marekani pamoja na utawala ghasibu wa Israel dhidi ya Jamhuri ya Kiislamu ya Iran kupitia azimio lao la pamoja, wakionya kwamba jinai na chokochoko hizo zinaweka amani na usalama wa kimataifa katika hatari kubwa mno.

Azimio la Bishkek lilisisitiza msimamo thabiti wa nchi wanachama kwa kubainisha: “Tunalaani mashambulizi ya kijeshi yaliyofanywa dhidi ya ardhi ya Jamhuri ya Kiislamu ya Iran, ambayo yamesababisha vifo na majeruhi ya raia wengi wasio na hatia pamoja na uharibifu mkubwa wa miundombinu ya kiuchumi ya nchi hiyo.”

Tamko hilo la Jumanne liliongeza kueleza: “Vitendo hivyo vinakiuka waziwazi misingi na kanuni za sheria za kimataifa pamoja na Mkataba wa Umoja wa Mataifa, huku vikitengeneza hatari kubwa kwa amani, usalama na utulivu wa dunia nzima.”

Mkutano huo wa kilele, uliofanyika katika mji mkuu wa Kyrgyzstan, Bishkek, uliadhimisha miaka 25 tangu kuasisiwa kwa umoja huo wa kikanda, ukidhihirisha wazi kupanda kwa ushawishi wake mkubwa kama ngome madhubuti ya kupinga na kuvunja udhibiti wa taasisi za kimataifa zinazoongozwa na kambi ya kibeberu ya Magharibi.

Mkutano huo uliwaleta pamoja viongozi wakuu kutoka kote eneo la Eurasia, akiwemo Rais wa Shirikisho la Russia Vladimir Putin, Rais wa Jamhuri ya Watu wa China Xi Jinping, Rais wa Jamhuri ya Kiislamu ya Iran, pamoja na viongozi wakuu wa India, Pakistan, na Uturuki.

Nchi wanachama zimekemea na kulaani rasmi matumizi ya hatua za upande mmoja za kulazimisha mambo katika uchumi wa dunia, ishara ya wazi inayolenga sera ya vikwazo haramu vya nchi za Magharibi, huku zikisisitiza haja ya kuanzisha mfumo wa kifedha wa kiadilifu na pande kadhaa unaopunguza utegemezi wa sarafu za kigeni zinazotumiwa kama silaha za kibeberu.

Azimio hilo pia lilifafanua kwa kina mwelekeo wa kimkakati wa jumuiya hiyo, likisisitiza kuwa SCO si muungano wa kijeshi au wa kisiasa wenye malengo hasi, na wala hailengi taifa lolote la tatu au mashirika mengine ya kimataifa.

Akilihutubia baraza hilo, Rais wa Russia Vladimir Putin alisisitiza ukubwa na umuhimu wa kijiografia na kimkakati wa SCO, akibainisha kuwa imetoka kuwa jumuia ndogo ya kikanda na kubadilika kuwa taasisi kubwa zaidi ya ushirikiano wa kikanda duniani kote.

Putin alisisitiza kuwa kila juhudi lazima zifanyike ili kutokomeza “chokochoko yoyote inayoweza kuzua mizozo ya kijeshi,” akibainisha kuwa kuimarisha mshikamano na ushirikiano baina ya nchi wanachama ni ngao muhimu ya kulinda amani na utulivu katika bara zima la Eurasia.

Kando ya mkutano huo, Putin alifanya mazungumzo ya faragha na mwenzake wa China ili kutilia nguvu zaidi ushirikiano wa kimkakati baina ya Moscow na Beijing.

Umoja unaozidi kuimarika na kuwa thabiti kati ya Russia, China na Iran umeibua hofu, chuki na hasira kali ndani ya utawala wa Marekani.