Az.R-ədə səhiyyə xidmət bərbad vəziyyətədəy
Hələ 20 sor çimi bə nav, 1999-minə sori Az.R parlamenti “Tibbi sığorta həxədə” ğanun ğəbul kardışe ki, məmləkətədə çe əhali səhiyyə sahədə problem və mışğılon bə səhmon eğando, kamtəminatinə təbəğə odəmon tibbi ehtiyacon lazımi səviyyədə təmin bıbo.
Bə vaxti Prezidenti deştə fərmani bə Naziron Kabineti dəstur doşe ki, 2 manqi muddətədə Devlətə Sığorta Aqentiyyəti bısoxto, əhali de tibbi sığorta təmin bıko. Əmo tosə ısət həmonə ğanun koğəzi səpe mandə, devlətə səhiyyə sahədə hərc-mərc Respublika həmmə jıqo muəssison əhatə kardəşe. Bı səbəbiku har sor çe Az.R çand sa həzo şəhrıvand bo mualicə ro bə İroni səhiyyə muəssison muraciət karde məcburiyyətədə mandedən.
Meydan TV Respublikadə jıqo ocizonə vəziyyəti çe Sabirabad şəhrestoni Axısxa diy sakin Şirvani Ələkbərovi timsalədə təsvir kardedə. Ələkbərovi bəştə ailə sə omə ğəziyyə jıqo təsvir kardəşe ki, “ Əv ıştən ciqərə noxəşi, jimoni həmroş jenə noxəşi, 17 sinninə kinəş çəşi noxəşiku 6 sore ki, bə mərizxonə kəybon dəl bıən. Əmo bə çəvon dardi çarə kardə lığmon peydo bıə ni. Bı muddətədə ıştə mol-mələ, kəy, həmən şəxsi ğıymətinə çizon həvatəşone, bə dast vardə pulon bə doxturon sərf kardəşone. Əmo çəvon səhhətədə bə çoki tərəf hic qıley nəticə hasil bənı. Bə Prezidenti və Vitse-prezidenti muraciəti bə peş əvşon bə Boku Respublika Mərizxonə, jimoni həmro bə Qinekoloqiya İnstitut, çey kinə bə Zərifə Əliyeva nominə Oftolmoloqiya İnstituti mualicə vığandışone. Bı muəssisonədə rışvəxorəti çe rayonisə həniən beaburə vəziyyətədəybən. Rayoni həkimon votedən ki, bə çanə zu bəvışkie anədə bıdə, əmo paytaxti ım səhiyyə muəssison isə oşkoə vıjorinbən. Har həkim ıştə ğıyməti ehandedə və hiç 1 kopikən bə qozəşt şedəni.
Şirvani Ələkbərov votedə ki, ısət çey xeyzon tamam muflis vəziyyətədəy. Bə manqədə 133 mənot sosialə nəfəğə umu mandən. Respublika səhiyyə sistemi əvon muflis kardışe, əmo bə çəvon dardi çarə nıkardışe.
