İşğaliyə Ğudsi şimolədə, 7 nəfər sionist rejimi hərbiçion həlok bey.
Zinə cımə şəv, xəbəiyə mənbəon raportışon do ki işğaliyə Ğudsi şimoli qullə ğandey dumoədə, 7 nəfər sionist kıştə bıə.
Bə İrna raporti əsos, sionist rejimi televeziya 13 minnə kanal raportış do ki Ğudsi şimolədə Əlnəbi Yəğob nomo bıə məntəğədə və qullə ğandey dumoədə, 7 nəfər qədə şəhri sakin bıə kəson həlok bıən.
Sionist rejimi mənbəon elanışon kardə ki ın qullə ğandey cərəyonədə, 12 nəfər həm zəxmin bıən.
Sionist rejimi polis həminə qullə ğandey amilonku qıləyni bə şəhodət rosneydə iyən bə co qılə amilon peydo kardey dəvomi təkidış karde.
7 nəfər sionist rejimi məhv və həlok kardey qıləy holədə əncom bıə ki Pencşəmbə rujədə, sioniston de əmniyəti-hərbi ğıvvon himoyə bə İyardaniya ru ətrofədə bıə Cenin laqerdi həmlə kardışone ki de Fələstini milləti muğaviməti dim bə dim be.
Həminə vəhşiyə təcavuzədə 10 nəfər Fələstinıj şəhid iyən 20 nəfər həm zəxmin bıən.həminə cinoyəti reaksiyaədə muğaviməti hərbiçion çand qılə rəket bə sionist rejimi qədə şəhron vığandışone.
Həminə cəhətədə, zinə sıb, çand sa nəfər Fələstinıjon və çəvon sədrədə, Fələstini islomiyə muğaviməti hərəkət (Həmas), de Cənin şəhri milləti ıştə vəhdəti nışo doey və ım şəhrədə sionist rejimi təcavuzon məhkum kardey cəhəto, hevujə etırozon və qırd bımonon bərpoşon kardə.