Tolış şəhrıstoni şəhid Nurani noxəşxonə təchiz kardey vey rə əncom bəbe
Qiloni tib elmon universiti tojə sərpərəst, Tolışi şəhid Nurani noxəşxonə təchiz iyən inkişofin və mıolicə baxşi zumandətiku xəbəş do.
Bə Tolış Rədio raporti əsos iyən bə Tolışon Niyuz sayti nəğli əsos, dəvardə Pencşəmbə, Tolışi fərmondor, Bəhmən Aşuri de Qiloni tib elmon universiti tojə sərpərəst,Doktor Muhəmməd Təği Aşobi vindemon iyən Tolış şəhrıstoni damon iyən səhiyyə xıdməton inkişofin zərrurəti barədə deyande votımonışon kardə.
Doktor Muhəmməd Təği Aşobi ijən təsdiğış karde ki Tolış şəhrıstoni bə noxəşxonə təchizaton vey ehtiyocışe iyən əlovəş karde: Tolışədə mıolicə baxşi strukturon zumand kardey bois bəbe ki millət bə ostani mərkəz mırociə nıkon ki həminə cəhətədə, həminə noxəşxonə MRİ baxşi inkişof doey təğib kardey vey zərruri zıneydə.
Həminə vindemonədə, Tolışi fərmondor həm Doktor Aşuri, Doktor Aşobi vırə bənə universiti sərpərəsti vıjniye təbrik votışe və tələbış karde ki Qiloni tib elmon universiti bə Tolışi səhiyyə xıdməton inkişof doey diğğət ko.
Tolışi şəhid Nurani noxəşxonə inkişofin bənə Qiloni ğərbi damon ğotb, tib turizmi rovnəğ doeyro, beynəlxalğə əhəmiyyəti soybe.
