“Ahay... mı hənuz bəyjim”;Ğərbi medya pesoxtə statistika və bo İroni həxədə maqi xəbəonku nımunəon

Pars Tudey-De Ğərb iyən israyili anqıl medya çe İroni imici təhrif kardə holə,oxonə iğtişoşənədə çe maqi xəbəon loyihə bə rujbomə vardey bıə və de mardə kəson rəğəmi əloğədor vey bıə statistika təğdım kardedə.Bın miyono, bənə “kıştə bıə kəson” nışon doə bıə insonon veyni tam səlomətin və bə ın cur hikoyəon dərci ıştə təəccıbin bey bəyon kardəşone.

Dəvardə haftəonədə İronədə bə əməl omə oxonə iğtişoşon çı xarici medya və siyosi hərəkoton tərəfiku mıxtəlif (və bəzən ziddiyyətinə) hikoyəonro bə diskussiya mərkəzi və platforma təbdil bıə;etırozon sıftədə təmomən qıləy dinc və sivilə xarakterış hestebe və polis və əmniyyəti ğıvvon həm bo etırozçiyon mıhofizəro səyon kardedəbe.Lakin de silohinə terroriston elementon nufuzi etırozon bə xaosi və aşubi təbdil be .

Bə Ğərbi və seonistə əmniyyəti və kəşfiyyoti rəsmiyon fiki əsos,çe dışmenə rejimon tərəfiku de silohi təchiz bıə terroriston,de iğtişoşon əloğədor bo medya onemoni təbliğot vositə təmin kardey məğsədi çe "İslomi Respublika tərəfiku bə etırozəkəyon zidd hevujə şikilədə bıə de sistematikə hoziyəti" hikoyə icod kardey məğsədi bıə "ğətl-amışon" bino kardə.Bə mevcud bıə sənədon və şoydon və əmniyyəti mutəxəssison ifodəon əsosən,ım ğətl dıqlə səviyyədə bə əməl omə;Sıftə,de kuçəonədə terroriston tərəfiku insonon ğətlı-ami,dıminə qıləyni həm de pesoxtə bıə rəvoyəton icod kardey və duyə statistika və de mardə kəson nomon təğdım kardey. " Pars Tudey " ın hisobot çın məsələ təfərruoton bərrəsi kardey niyyətədəy.

Xıdolim ha!...Az hələm həm səlomətim!

De "Mucohidin-e Xəlğ" terrorə qrupu əloğədor bıə bəzi medya təşkiloton çe İroni etırozonədə həlok bıə kəson həxədə duyə xəbəon dərc kardeyışon bino kardə.Bın miyono,bənə mardə ğeyd bıə kəsonku kali insonon səlomətin və əslən kıştə bıənin;İroni hukuməti əmniyyət ğıvvon tərəfiku kıştə bıey bə i tərəfə bımando! jıqo holon bəzi qıləyni jintono doey bıə.

İronədə bənə MKO(Mıcohidon Xalğ Partiya) zıney bıə terroristə qrup bıə de "Mucohidin-e Xəlğ" əloğədorə medya orqanon,"Kuroş Şirin" nomo nevcıvonə zoə şikili pevolo kardə holədə,oxonə iğtişoşon zəmonədə çe Tehroni Piruzi kuçədə çe İroni əmniyyət ğıvvon tərəfiku kıştə bıey iddiyo kardedən.Lakin sosyal medyadə bardə bıə nəvemoni nəticədə məlum bıə ki,çın medya orqanon tərəfiku dərc kardey bıə şikil,bə seonist rejimi sabiğ sər vəzir"Nəftali Bennetti" zoə "David Bennett"-i məxsuse.

Ğərbi bəzi medyaon,9 yanvar iğtişoşonədə çe (İroni şimol) Qılıstoni əyolətiku bıə bənə "Baby Rideri"zıney bıə məşhurə bloqqer,bənə "Diana Bahadur"-i məşhur bıə "Şəhrzod Məxami" nomo 19 sinninə kinə kıştə bey iddiyoşon kardə;lakin xəbonədə çəy çe avtomobili təsadufədə həlok bey bəyon kardey bıə.Im cıvonə kinə 23 yanvar torıxədə saat 22:30-ədə(iğtişoşonku təxminən dı həftə bədiqə) Pasənq di əraziyədə bıə Qılıstoni Cənqəli-Qalikeş şəhrə maqistrali royədə bə muhofizə divo qıniyə holədə mardə.Qılıstoni roy polisi rəsmiyon ın təsudıfışon çı ranəndə bedığğətəti və barzə surəti səbəbiku nəğliyyot vositə idorə nıkardey əloğədor zıneydən. Bə jurnaliston doə musohibədə çı Şəhrzodi dədə "Kərim Məxami" çəy kinə çe avtomobili təsodufi zəmonədə kıştə beyış təsdığ kardə və təkidış kardə ki,çəy maqi hodisə de iğtişoşon qıləy rabitəş bıəni.

Qorqaniku bıə 21 sinninə"Mobina Beheşti" kinə bə İslomi Respublika zidd medya suyi-ğəsd loyihə coqlə ğıboniye.Çandə ruj bə sosyal şəbəkəon osə ğandey bədiqə əv,kiberməkonədə deştə maqi anqıl şayiəonış oşko kardə.Binobərin,əv,28 yanvarədə boştə bəyji bey elon kardero ıştə vidyo pevolo kardey məcburiyyətədə mandə. Mobina votəşe:"Həyğətən,təəccıb kardedəm ki,ki ımış kardə? Çımı səloməti iyən sıhhətım əloye;deçımı maqi anqıl foto və vidyo bəpe çıro pevolo bıbu? Xohiş kardedəm bə xarici medya sıxanon bovə məkənən;çəvon bəmə ğərəz du votey coqlə çişon ni!

Coqlə vırədə,israyili Kanal 12 televiziya işğal bıə əraziyonədə jiyə "Noveya Zion"nomo seonistə kinə bənə İronədə bıə etırozonədə kıştə bıə yəhudi şəhrvandi təğdım kardedə.Im cıvonə kinə həmçinin ıştə "Tik Tok" sosyal şəbəkədə vidyo pevolo kardə holədəıştə bəyji beyış elon kardə.Zioni votəşe:"Dılım larzedə. ıştə həyotədə jıqo qıləy çi bəçımı sə omey hiç vaxt fikım kardəm nıbe.Kədəm və  bə varzış şeydəm. "Əv,həmçinin təkidış kardə ki,İronədə qıləy ğohum və ya oşnoonımon ni.

Bəzi medya orqanon "Sənaz Jəvaherian" nomo ım israilıjə kinəku bəhsış kardə və etırozon zəmonədə həbs bey bədiqə çandə saatisə ziyodə je-kuey bıə holədə kıştə bıə və 13 ruji bədiqə çəy cəsədi bə dumo oqordıney iddiyoş kardə.Im məsələ bo çandə qılə onlayn fəolonro bə yumor və zərfət mənbə təbdil bıə. Bəziyon de istehzo bə Zioni votəşone:"Tı İronədə mardəş yəğın,əmmo ıştı bədən qame və hənuz həm dərəsəniş."

De ğətli loyihə anqıl coqlə xəbədə,İroni Lorestoni əyoləti Pol-e Dokhtar şəhrıstoni boks komitə rəhbəri "Əli Əlipuri" 9 yanvarədə etırozon zəmonədə həbs bıə holədə de işkəncə kıştə bey elon kardey bıə.Im qıləy holədəy ki,əy 22 yanvarədə çe dıli noxəşətiku bəfotış kardə və iruj bədiqə çı əyoləti idmonə rəsmiyon anqıl qıniyə mərosimədə dəfn bıə vaxte.

De israyili anqıl medya orqan bıə İron İnternasiyonli Şəbəkə,coqlə xəbədə bodibilder "Məhəmməd Rəsul Bəyati" İronədə bə əməl omə oxonə iğtişoşon coqlə ğıboniş zınə.Bımi cəvobən,İroni Tele-Rədyo Korporasiya(IRBC) muxbiri həm bə ın varzışkori klubi osəş ğandə və deəy qəpış jeyə.Bəyati,çın cur duyə xəbəon dərc beyku ıştə təəccıb və təəssıfi hissi dəvordıney bəyon kardə holədə,ıştə komilə səlomətətiş elon kardə.Əv,dışambə rujiku jıqoşə duyə xəbəonku norohət bıə və ıştə xıyzon iyən ğohumonku seyə behisobə zanqonkuş sıxan kardə.

Medya suyi-ğəsdi loyihə ğıboniyon miyono bıə Farsi əyoləti Kəvar şəhriku bıə İroni şəhrvand “Rıza Niknam” həm şoyiəon rədd kardey və çəy qullə hardey xəbə təkzib kardey və ıştə səlomət bey bəyon kardə qıləy vidyoş pevolo kardə.

Qıləy kanə ssenari tikror

Incur holon internetədə veye və bo hevujə iştimoiyyətiro de hostonəti bə dast vardey mumkine.İltihob tədricən bəkam beyədə və bə terrorizmi dastək doə medya xok nışteyədə ziyodə fakt və sənədon dərc kardey bəbe.Bə çın medya təşkiloton və bəçəvon himoyə kardə şəxson və hərəkoton ğeydon nəzə səğandeyədə,çəvon ğeydonədə analoji holon vey bey vindey bəzınemon.Məsələn,“Əhməd Batebi” 1999-ə sori iyulə manqədə çı iqlə qrup tələbə məhdud etırozi zəmonədə ıştə xuninə şəy ıştə səy peyo rost kardə holədə etıroz kardə tələbəonku qıləyni məxsus bey iddiyo kardeyədə;Amerkə "The Economist" jurnal ıştə əsosə cıldi peyo çe Batebi şiklış dərc karde.qıləy holədə ki,çandə soron bədiqə çəy şəy de "bızi xuni" ləkənin bey bə miyon beşe!

De ın rısvoyçəti və bə İroni xalği və hukuməti ələyh duyə sıxanon torıxi rəğmən,Əhməd Batebi,de "Məsih Əlinejadi"(AİŞ Devlətə Departamenti həmko)bə ico,çe Ğərbi rəsmiyon tərəfiku İronədə bə əməl omə çiyon mınosibət nışon doeyro bə İMT Əmniyyət Şura 15 yanvar iclosi dəvət kardey be.Jıqo qıləy dəvətin məğsəd, ehtımolən,mıtləğə həyğəti bəyon kardey ne,çe naviku nıvıştə bıə ssenari təkror və təsdığ kardeye.Dı nəfəri de İronədə bıə hodisəon əloğədor doə məlumot anədə ğərəzin və ğeyri-real be ki,çe Rusiya İMT-ədə bıə dayimi nımoyəndə Vasili Nebenzya bımi reaksiya nışon doə holədə votəşe:"20 sorisə ziyodə Amerkədə jiyə və əyo bə İroni əleyh ıştə bərnoməon bə həyot dəvordınə ın fərdon çe İroni xalği təmsil kardey əzınin."

Boçi bəpe ğətl icod kardey bıbu?

AİŞ və seonist rejimi de ğətl icod kardey loyihə vositə dıqlə məğsədi dumoye.İminə qıləyni,paralel behron icod kardey strateqiya və iştimoyi ray,rejimi 7 oktyabr 2023-ə soriku jıqoşə şəhidon ədəd bə 71.662-i, çe zəxminə şəxson rəğəm bə 171.428-nəfəri rəsə Ğəzzə xalği ələyh dəhşətinə cinoyətonku mınhərif kardero əksə muhəndisəti.Əve həm,bo çın cinoyəti çırkinəti miyoniku bardero İronədə həm bəpe analoji və ya nezə statistika "icod kardey bıbu".De ın təsviri Ğərbi və seonistə medya İroni etırozonədə (bə Ğəzzə şəhidon bərobər) 71.662 maqi statistika təğdım kardey çe intizoriku bə diyəro ni.

Dıminə qıləyni,çe AİŞ-on(xususən həm çe Trampi administrasiya) təcrubə nışon doydə ki,əv,adətən ıştə mənafeyon təmin kardero və beynəlxalğə konsensusi bə dast vardero ıştə mıstəmləkə məğsədon zohirən çe həx çiyə şuoron jiyədə punhon kardedə.ı mıddət bənav Amerkə lideron bə Venesuela prezdent Nikolas Maduro ələyh hevujə təbliğot bardə holədə əy bə narkotik maddəon ğaçəği əməliyyoton rəhbərəti kardeyədəmıttəhəm kardedəbin və peşo bə qırd beynəlxalğə qanunon və standarton zidd bıə holədə əvışon bəşəvnəy vitovnə holədə bə AİŞ-on bardeşone.Qıləy holədə ki,beynəlxalğə məsələon sahədə ziyodə eksperton çı Vaşinqtoni ın hərəkətədə bıə məğsədışon çe Venesuela natə ehtiyoton peyo bıə hukmronəti kardey hisob kardəşone.AİŞ-on bə İrağ və Əfğanıstoni hucumon və s.həm analoji vəzyəte.İroni barədə həm,Ğərbi tərəfon bə İroni zidd tətbiğ kardə bıə 12 rujnə muharibədə bəştə məğsədon nırəsey bədiqə ehtımolən çı Vaşinqtoni mudoxiləon və təcovuzkorə hərəkəton bə həx bekardero qıləy nuyə bəhonə dumo bey votey bəbe.