Heydər Əl-İbadi de İraği parlamenti səçıni ləğv karde muxalifətış kardə.
İraği sər vəzir ım kişvərədə tojə parlamenti səçıni nəticə ləğv karde rədış kardə.
Bə İrib raporti əsos, İraği sər vəzir Heydər Əl-İbadi zinə ruji ım kişvərədə bıə tojə parlamenti səçıni nəticə botil karde rədış kardə iyən səçıni komissiyə rəsmi şəxson sıxənonku səçıni nəticə botil karde bəpeştə İrağədə ehtımaliyə daxıliyə canqi bino bey barədə təəccubış kardə.
İraği parlament deşambə əsri de əksəriyət sədo, təsdığış kardə ki kişvəri xarıcə ədə bıə səçıni nəticəon ləğv iyən tojə səçıni həmmə sədonku 10 faiz de dasti vasitə aşmarde bıbu.
Bə İraği parlamenti ğanuni əsosi, əqə de dasti vasitə aşmardə bıə sədoon 25 faiz nəticədə dast dənoe və saxtəkorəti nışo bıdə bəbe həmmə vırəon sədo de dasti aşmarde bıbu.
Səlahuddin, Ələnbar, Neynəva və Diyalə ostanonədə bıə avarəon kəmp iyən Kırdıston və Kərkok məntəğəonədə intixabati nəticə ləğv karde əcumlə İraği məclesi tojə iclosi təsdığ kardə bıə mıvzoonin.
İraği səçıni aliyə ğərorqo elanış kardə ki İraği məclesi ım ğərolon təğib bəkarde.
İrağədə 4-nə parlamenti səçın(Mayə 12) bərpo be iyən de Moğtəda Sədri rəhbəriyəti Saeron nomo bıə koalisiya, rəğibon vədə de kamə ixtilofi veyə kursi iyən vırəon kasbış kardə.
