Rəyisi: Tehron və Boku miyono rabitəon çı deşmonon tahrik kardə hərəkəton jintonədə ğəror nibəqəte
İron İslom Respublika prezident, Seyd İbreym Rəyisi de Azərbaycan Respublika prezident, İlham Əliyev telefoniyə votımonədə votışe: Tehron və Boku miyono rabitəon çı deşmonon tahrik kardə hərəkəton jintonədə ğəror nibəqəte.
Cımə ruji həmlədə ki Tehronədə bə Azərbaycan Respublika səforətxonə silohinə həmlə əncom bıə, ım səforətxonə mıhofizəkə kıştə bıə iyən 2 nəfər co qılə mıhofizəkə həm zəxmin bıən.
Bə İran Peres aqentiyəti raporti əsos, zinə şənbə şəvədə, de Azərbaycan Respublika prezident, İlham Əliyevi telefoniyə votımonədə, Tehronədə bə Azərbaycan Respublika səforətxonə silohinə həmlə cərəyonədə, İroni millət iyən dıvləti təsliyət bə Əliyev elan bıə.
İron İslom Respublika prezident Seyd İbreym rəyisi həm, həminə hodisə icod bey bəpeşt vey rə əmrış kardə ki ım hodisə təğib bey bino bıbu və de ım surət de Azərbaycan Respublika millət iyən dıvlət ıştə hamdardəti nışoş do.
Rəyisi ijən işorəş karde ki İron və Azərbaycan Respublika miyono dust iyən bıvə rabitəon bə co nıbıə torixi iyən mədəni dəçoknəon əsose, əv ijən əlovəş karde: İron və Azərbaycan Respublika dıvləton, icozə nibədon ki çəvon rabitə, deşmonon elğo kardə çiyon jintonədə ğəror bıqəto.
Azərbaycan Respublika prezident, İlham Əliyev həm həminə telefoniyə votımonədə, Rəyisi təsliyət iyən hamdardiku ıştə ğədrdonətiş nışoş do iyən Tehronədə bə Azərbaycan Respublika səforətxonə silohinə həmlə əncom beyku ıştə heyrətin elanış kardə və votışe: həminə baxşonədə, 2 qılə kişvəri həmkoəti bəpe jəqo bıbu ki hiç kəs bə jıqo hodisəon bəhonə, 2 qılə kişvəri dustonə rabitəonədə problem icod kardey əzı nıbu.
