Paralimpiya hənəkon
Paralimpiya hənəkon
Çın devrə mısobiğəon mahbubə varzışkoronku qıləyni Mırtəzo Mehrzad be.milodi 2009-ə sori bə televizyə bərnoməon dəvət bey bənav,fik nıəkardi ğərole ki,deştə huzur iyən iştiroki ıştə ayəndə əvəz karde və bə həmməysə məşhurə fərdonku iyən medal vardə varzışkoronku qıləyni təbdil bıbu.həmonə soriku çəy vey barzə bolu ki,boəy vey saxtətiş icod kardəbe,boəy bə qıləy məziyyət iyən barzəti təbdil be.
Çalusi nıştəco voleybol komandə kapitan deəy təmosış qəte və əvış bə nıştəco voleyboli omutey təşviğış karde.Mırtəzo 2015-ə sori bə İroni milli nıştəco voleybol komandə dəvət be iyən 2018-ə Dınyo Çempiyonəti mısobiğəonədə bənə həmməysə barzə əlilə varzışkori unvoni vıjniyə be.çə zəmoniku de tobə ısət Mırtəzo Mehrzad bənə fransə 2024-ə sori Paralimpiya hənəkon astovə iyən bənə yeqanə telı medali bəştə qıy ehaştə kəsi unvoni çəyku nom bardedən.Mırtəzo Mehrzad de 2 metr 46 sant bolu bənə dınyoədə dıminə vey barzə şəxs iyən Paralimpiya hənəkonədə həmməysə barzə şəxsi zıney beydə...
Mehrzad hırdənəti zəmonədə Akromeqaliya noxəşəti mıbtəlo be ki,qıləy nodirə noxəşətiye ki,hormonon çe həddiku zoyodə ruşd və inkişofış kardə.əv,cıvonəti zəmonədə de dıçəxə ya həmonə velsəpedi təsadufış karde,çəy lınqi zədəş vinde iyən ısət həm çəy rostə po bəsə çəy çəpə lınqisə vey kırte və ruşdış nıkarde.Mehrzad ıştə sehbətonədə votəşe ki,əv məhdudiyyətonış bə qıləy fırsətiş təbdil kardə.əmmo votey nibəbe ki,ın məhdudiyyəton komilə surətədə çe miyoniku şe.əmmo de zəmoni dəvardey bə milli nıştəco voleybol komandə anqıl qıniyə zəmoniku kam be.əv,çe İroni co qılə iftixor ofəyə varzışkoron kəno sabitış karde ki,məhdudiyyəton bə qıləy fırsəti təbdil kardey bəbe...
Səyid Əfruz çe Kermani viloyəti Cirofti diyonku qıləyni əhalikuye.əv həmonə kəse ki,2024-ə sori Paralimpiya hənəkonədə de nizə ğandey mısobiğədə de 41.16 santimetr dırozi ğandey dınyo rekordış darışte(çımi bənav rekord həm 34 ef klasədə çəy rekord be) və bın sahədə telı medalış bə dast varde.əv, çe po nohiyəku movardə əlilətiş heste.əmmo ın məsələ hiçvaxti boəy məhdudiyyət bıəni iyən de veyə səyon ıştə dıli piyə idmani sahədə bə həmməysə çokə məğamon dast pəydoko.əv,votedə ki,az qıləy divoj bim iyən hejo həmonə hırdənətiku de pəs və mol-mələ çovnedəbim iyən de sığ ğandey məşğul bim ki,bın zəmon ıştə zu və ğudrətiku xəbədo bim iyən ın idmani sahəm vıjniye.əv,deştə zuku xəbədo bey jimonış boştə iyən boştə xıyzoni qıləy çokə vırəş təbdil kardə.
Coqlə delavər merdonku ki,bo İroni medal vardeyış zınə,bəpe bə Yasin Xosrəvi iyən Əmir Huseyn Əlipur vəznə ğandeyədə,Ruhullah Rustəmi qonə atletikə iyən Əli Əkbər Ğərib Şahi nomi qonə atletikə sahəonədə ğeyd kardey bəbe ki,ımon bo İroni telı medalışon bə ərməğon vardəşone və İroni nığə medalon həm de Məhdi Ovlad iyən Zəfər Zakir həm vəznə ğandeyədə,Həsən Baculənd disk ğandeyədə və həmçinin Əli Piruc nizə ğandeyədə və Meysəm Bəni Təya təvəssıti paracudo sahədə bə dast omə.
İroni bronz medalon həm de Əlirıza Moxtari iyən de Əli Əsğər Cəvanmərdi vositə vəznə ğandey sahədə və Muhəmməd Rıza Ərəbəmri həm nizə ğandey sahədə iyən para tiy-kəmon ğandey sahədə,Muhsin Bəxtiyari qonə atletikə sahədə,Əli Rıza Bəxt iyən Hamid Həxşenas parə taekvando baxşədə bə dast omə...
Paralimpiya bın devrə mısobiğəonədə ziyodə ironıjə jenon dəvəşən.çəvonku min cumlə Sara Cəvanmərdi para tiy ğandeyədə,Fatmə Himməti para tiy-kəmon ğandey sahədə,Zəhro Rəhimi parə taekvando baxşədə Hacər Səfərzodə para atletikə sahədə,İlhom Salehi nizə ğandeyədə iyən Pərəstu Həbibi klub ğandey sahədə bıə xanımə varzışkoronin.
Sara Cəvanmərdi idmanış 18 sinnikuş bino kardə və Şirazi əhlikuye və qıləy hırdə fərzəndış heste. əv, Tokyo 2020-ə Paralimpiya hənəkonədə dınyo rekordış je və telı medalış kəsb karde.əv, Paralimpiya mısobiğəonədə iminə ironıjə medal vardə banuye və ımsornə Paralimpiya mısobiğəonədə həm 10 metrəynə Pnevmatik tapançə idmani nevədə bə telı medali dastış pəydo karde.Sara Cəvanmərdi te dobə ısət 2012-əsoriku jqoşə 5 kərə Paralimpiya hənəkonədə iştirokış kardə və həmişə həç de medali bə İron oqardə.
Fatmə Himməti para tiy-kəmon ğandey sahədə coqlə varzışkoronkuye ki,21 sinnış heste ki,bın devrə mısobiğəonədə dıqlə nığə medalış kəsb kardə və Şərği Ozorboyconi ostoniku və Təbrizi şəhrikuye.əv, para tiy-kəmon ğandey sahədə iyən jenon fərdi kopvandi idman və umujənə komanda kopvandi sahədə nığə medalış bə dast vardeyış zınə.
