528-ə hissə-Məryəmi surə-46-50 şərifə ayəon

528-ə hissə

قَالَ أَرَاغِبٌ أَنتَ عَنْ آلِهَتِي يَا إِبْراهِيمُ لَئِن لَّمْ تَنتَهِ لَأَرْجُمَنَّكَ وَاهْجُرْنِي مَلِيّاً (46)

Voteşe: ha İbreyim ha! ayə çımı xıdoonku bezoş?(bəvon nifrət kardedəş?) ehanə çın(hərəkətiku) dast nıkəşoş, şəkk ni tıni sənqısar bəkam. və(ısət) qıləy dırozə mıddətədə çımıku bə diyəro bımand.

قَالَ سَلَامٌ عَلَيْكَ سَأَسْتَغْفِرُ لَكَ رَبِّي إِنَّهُ كَانَ بِي حَفِيّاً (47) 

(İbreyim çəyku co be)Voteşe: səlom bıbu bətı, rəyrə ıştə pərvərdıqoriku botı istiğfor tələb bəkam. zira əv, hejo bəmı nisbətədə vey mehribon bıə.

Dəvardə proqramədə ərzımon karde ki,İbreyim(ə)-i yol və ğəyyum  qıləy mışrikə fərd be. ə həzrət dılış hestebe əy irşod iyən hidoyətkəy,əve bəy çı şırk iyən bıtpərəstəti ağıbətiku tars iyən xəbərdorətiş doe.

In ayəon hamyedə: həzrəte İbreyim(ə)-i yol bəçəy sıxanon iyən dəlilon dığğət kardey əvəzi,bə ğərol ome ki,de İbreyim(ə)-i tındə rəftorkəy .əve oqarde bəy voteşe: nəinki,fəğət mı ıştı dini ğəbul kardedənim,bəlkəm ya tı çımıku bə diyəro bımand və ya ehanə tı çımı palu bımandoş,az ıştən bəştı oxo bebəşem.əv həm de qıləy vey şiddətinə formə tıni sənqısar bəkam.

Əmmo həzrəte İbreyim(ə) bəçəy ğeyri-məntiği sıxanon cəvob doey əvəzi,de namə sıxan iyən məhəbbəti bəy voteşe:az detı canq iyən dave kardey fikədə nim. bəlkəm, de sulh iyən səmimiyyəti tıni bə Xıdopərəstəti dini tərəf dəvət kardedəm.ısət tı ki, ğəbul kardedəniş, mı nəinki,bəştı ələyh hiç qıləy yavə ko əncom doydənim,bəlkəm az botı Xıdovəndiku istiğfor həm tələb bəkam ta əv tıni bıbaxşo.az bətı nifin nibəkam ki, Xıdo tıni məhvkəy.

Çın ayəonku umutedəmon:

1-qıləy şəxs ki,məntığış ni,əv hoziye.peyğombəron sıxan de məntığ iyən istidloliye və əvon hiçkəsi bo ilahi ayini ğəbul kardey məcbur kardedənin.əvon fəğət bəştə dıləsusəti xoto məxloği bə həxə roy dəvət kardedən.

2-İlahi merdon çı deşmoni təhdidon vədə səbr kardedən iyən tov vardedən və bə Xıdo lutfi umudəvon.

3-səy bıkəmon çı cokəson ğeyzinə sıxanon otəşi,deştə namə rəftori həmuşkəmon. nəinki, əy tikihəm şuləvərkəmon.

وَأَعْتَزِلُكُمْ وَمَا تَدْعُونَ مِن دُونِ اللَّهِ وَأَدْعُو رَبِّي عَسَى أَلَّا أَكُونَ بِدُعَاء رَبِّي شَقِيّاً (48) 

Az şımə iyən şımə Xıdo vanq jıə çiyonku bədiyərom. və(fəğət) ıştə pərvərdıqori vanq jedəm. umu heste ki, ıştə pərvərdıqori vanq jıeyədə məhrum nımandım

Həzrəte İbreyim(ə)-i yol və sərpərəst əvış çı dıqlə roy miyono ğərolış doe.ya əv əy tərk kardənin be və ya boştə mardey imzo kardənin be.ın ayə hamyedə:həzrəte İbreyim(ə)-i voteşe:ısət ki,şımə jıqo piyedəyone,az şımə paluku bəşem iyən bəştə Xıdo təvəkkul kardedəm ki,əv mıni ıştə lutf və rəhmətiku məhrum nıkəy.

In ayə bə mınhərifə aylədə jimon kardə iyən ıştə din-imoni hifz kardey nızınə cıvonon qıləy ro nışon doydə.əvon bəbe çı həzrəte İbreyim(ə)- şıə ro boştə sərlovhə ğərol bıdəyn və ehanə lozım bıbu,ıştə xıyzoniku co bıbon.

Çın ayəku umutedəmon:

1-rabitəon ğət kardey çı nəhy-əz munkəri oxonə mərhələy,nəinki,iminə mərhələ.qıləy vırədə ki,fosidə muhiti əvəz kardey zıneydənimon,hiç nıbu əvrə tərkkəmon.

2-hətta peyğombəron həm boştə vəoməy xoto,bə Xıdo lutf umudəvon və hejo çı xof və umudi miyonon.həm tars iyən həmən,umuşon heste.

فَلَمَّا اعْتَزَلَهُمْ وَمَا يَعْبُدُونَ مِن دُونِ اللَّهِ وَهَبْنَا لَهُ إِسْحَاقَ وَيَعْقُوبَ وَكُلّاً جَعَلْنَا نَبِيّاً (49) 

Və çoko İbreyim mışrikon iyən çəvon çı Xıdo əvəzi pərəstış kardə çiyon bə kənoş noe və əmə İshoğ iyən çəy(fərzənd)Yəğubımon bəy əto karde və əvonro qırd peyğombər ğərol domone.

وَوَهَبْنَا لَهُم مِّن رَّحْمَتِنَا وَجَعَلْنَا لَهُمْ لِسَانَ صِدْقٍ عَلِيّاً (50) 

Və ıştə rəhmətiku bəvon əto kardemone iyən boəvon(məxloği miyono) barzə(məğam) iyən çokə nom ğərol domone.

İbreyim(ə)-i çı şırk iyən bıtpərəstəti muhitiku bə kəno mandey bədiqə,Xıdo həm ıştə məxsusə rəhmətış bəy nozil karde və bəy fərzəndonış baxş karde ki,Xıdo tərəfiyo bo məxloği hidoyətiro bə peyğombərəti vıjniye bin.bənə İshoğ iyən çəy fərzənd bıə peyğombəron.

Deməkə ki, həzrəte İbreyim(ə) ıştə zəmonə yeqanə yektapərəst iyən tohidi əhl be,əmmo ijən nıtarse  və coyli çı qırd şırk iyən kufri mığobilədə istiğomətış karde. ım qıləy yolə dərse bo ilahi həyğiyə dinon tərəfdoron ki,hiç qıləy şərayitədə ıştə din və ayiniku dast nıkəşon.

Çın ayəonku umutedəmon:

1-çı pıon çokə ko təsiron çəvon vəomə nəslədə zohir bəbe və bə salehə şəxson salehə fərzənd ilahi lutfonku qıləyniye.

2-ehanə sovə Xıdo həmməy sə vadəmon,ilahi lutfon çəmə səpe ru bəbe və inson iyən çəy nəsli ebəqəte.

3-məxloği miyono çokə nomi soyb bıey,ilahi lutfonku qıləyniye ki,Xıdovənd əy bə pok və çokə şəxson inoyət kardedə.