Ислом инқилоби посбонлар корпуси вакили: Ҳурмуз бўғози Эрон шартлари қабул қилингунига қадар ёпиқ қолади
Ислом инқилоби посбонлар корпуси вакили генерал Ҳусайн Муҳаббий: «Агар АҚШ Эрон шартларини қабул қилмаса, Ҳурмуз бўғози ҳеч қандай ҳолатда очилмайди», деди.
«Парс Тудей» хабар беришича, Ислом инқилоби посбонлар корпуси вакили генерал Ҳусайн Муҳаббий Ҳурмуз бўғозидаги сўнгги вазият ҳақидаги саволга жавоб берар экан, Ҳурмуз бўғози Эрон назоратида экани ва Форс кўрфазида душманнинг бирорта ҳарбий кемаси мавжуд эмаслигини маълум қилди.
Ислом инқилоби посбонлар корпуси вакилига кўра, душманнинг барча ҳарбий кемалари Ҳурмуз бўғозидан камида 400 километр узоқлашган. Ҳарбий ва ҳудудий нуқтаи назардан, Эроннинг рухсати ва назоратисиз ҳеч қандай кема ушбу сув йўлидан ўта олмайди.
Генерал Муҳаббий Уммон яқинида жойлашган мазкур сув йўли ҳам тўлиқ Эрон Ислом Республикаси назорати остида эканини таъкидлаб, шундай деди: «Ҳурмуз бўғози Эрон ва Эронга қарши соҳилда жойлашган Уммон давлатига тегишли. Биз тахминан бир ой олдин Уммон билан музокараларга киришдик ва ҳар икки томон қабул қилган натижаларга эришдик».
Ислом инқилоби посбонлар корпуси вакили, шунингдек, музокаралар давомида бўғоз сувларидан ҳар икки давлатнинг улуши, шунингдек, Эрон ва Уммоннинг мазкур сув йўлидан олинадиган даромадлардаги ҳиссаси бўйича келишувларга эришилганини айтди.
Генерал Муҳаббий АҚШ ушбу жараёнга тўсқинлик қилаётгани ва бу ҳолат ишлар жараёнининг кечикишига сабаб бўлганини қайд этиб, шундай деди: «Агар АҚШ тўсқинлик қилишни тўхтатиб, англашув меморандумига қайтса, эришилган келишув доирасида Ҳурмуз бўғозини очишимиз мумкин. Шунинг учун Эроннинг шартлари АҚШ томонидан қабул қилиниши керак».
Ислом инқилоби посбонлар корпуси вакили огоҳлантириб, шундай деди: «Агар АҚШ бизнинг шартларимизни қабул қилмаса, Ҳурмуз бўғози ҳеч қандай ҳолатда очилмайди».
