Гарвард университети профессори: сионистик лоббининг таъсири Эрон билан урушни тугатишга тўсқинлик қилмоқда

Машҳур халқаро муносабатлар назариячиси Дональд Трампни «АҚШ тарихидаги энг фожиали президент» деб атади ва сионистик лобби таъсирини Эрон билан урушни тугатишга тўсқинлик қилаётган асосий омиллардан бири сифатида баҳолади.

Палс-Тудей хабарига кўра, халқаро муносабатлар соҳасидаги машҳур назариячи ва Гарвард университети профессори «Стивен Уолт» таниқли америкалик телебошловчи «Такер Карлсон» билан суҳбатда АҚШнинг Эронга қарши уруш бошлаш сабабларини изоҳлар экан, Исроил режими бош вазири «Биньямин Нетаньяху»ни бевосита асосий айбдор деб атади.

У шундай деди: «Бу урушнинг сабаби Нетаньяҳунинг Оқ уйга ташрифи бўлди. У келиб, Эрон парчаланиш арафасида турганини ва режимни ағдариш учун унга фақат кучли бир зарба бериш кифоя қилишини тушунтирди. У Дональд Трампни бу таҳлил тўғри эканига ишонтиришга муваффақ бўлди».

Гарвард профессори таъкидлашича, Нетаньяҳу аввал ҳам худди шу таклифни Жо Байден ва Барак Обамага билдирган, аммо улар буни ёмон ғоя деб ҳисоблаган. Бу сафар эса Трамп бу таклифни қабул қилган.

Уолт Трампни бундай қарор қабул қилишга ундаган омилларга тўхталиб, Венесуэла президенти «Николас Мадурони» ўғирлаш операциясининг муваффақиятига ишора қилди. Унинг айтишича, Трамп қисқа муддатли агрессив уруш ва кам харажат эвазига масалани бутунлай ҳал қилиб, ўз номини тарихда қолдириши мумкин, деб нотўғри ўйлаган.

Уолт таъкидлади: «Агар Трамп бугун қандай вазиятга тушиб қолишини билганида, ҳеч қачон бундай ишга қўл урмаган бўлар эди».

АҚШ жамоатчилиги урушга қарши эканига қарамай, нега унга қарши кенг кўламли намойишлар ўтказилмаётгани ҳақидаги саволга жавоб берар экан, Уолт сиёсий тизим ва лоббилар таъсирига ишора қилди. У «мен Исроил лоббиси деб атайдиган тузилманинг бир қисми» узоқ вақтдан бери Эронга қарши ҳарбий ҳаракат бошлаш учун босим ўтказиб келаётганини қайд этиб, ушбу таъсирни урушни тугатишга тўсқинлик қилаётган асосий омиллардан бири деб атади.

Уолт, якунда, Дональд Трампни «АҚШ тарихидаги энг фожиали президент» деб атаб, у урушларни тугатиш ҳақидаги ваъдаларини бажармаганини таъкидлади.