Rusiya və Azərbaycan xarici işlər nazirləri arasında telefon danışığı olub

Rusiya və Azərbaycan Respublikasının xarici işlər nazirləri"3+3" platformasını müzakirə ediblər

Oktyabrın 20-də xarici işlər naziri Ceyhun Bayramov və Rusiya Federasiyasının xarici işlər naziri Sergey Lavrov arasında telefon danışığı baş tutub.

Bu barədə Azərbaycan Xarici İşlər Nazirliyindən bildirilib.

 Telefon danışığı zamanı tərəflər iki ölkə arasında əməkdaşlıq gündəliyi üzrə mövcud perspektivlər, Azərbaycan-Ermənistan normallaşma və sülh prosesi, habelə bölgədəki cari vəziyyət barədə müzakirə aparıblar.

 Regionda sülh və sabitliyin təmin olunması, Azərbaycan və Ermənistan arasında bərabər və qarşılıqlı hörmətə əsaslanan davamlı sülhün bərqərar edilməsi istiqamətində göstərilən səylərin davam etdirilməsinin, bu gün bölgədə yaranmış tarixi imkanın əldən verilməməsinin vacibliyi vurğulanıb.

 Telefon danışığı zamanı, həmçinin qarşılıqlı maraq doğuran digər regional və beynəlxalq məsələlər ətrafında fikir mübadiləsi aparılıb.

 Bundan əvvəl Rusiya Xarici İşlər Nazirliyinin məlumatına görə, Sergey Lavrov və Azərbaycanın xarici işlər naziri Ceyhun Bayramov telefon danışığı zamanı Cənubi Qafqaz üzrə “3+3” regional məsləhət platformasının işini müzakirə ediblər.

Qeyd edək ki, Ermənistanın baş naziridə artıq bu ilin sonuna qədər Azərbaycan Respublikası ilə sülh sazişi imzalamağa və münasibətləri normallaşdırmağa hazır olduğunu bəyan edib.

Nikol Paşinyan Ermənistan ərazisində Azərbaycan Respublikasının bütün vətəndaşlarının təhlükəsizliyinə zəmanət verdiyini bildirib.