Արաղչի. Բեռլինը առաջընթացի շարժիչից վերածվել է Եվրոպայի հետընթացի գործոնի
Իրանի և միջազգային զարգացումների վերաբերյալ Գերմանիայի կանցլերի դիրքորոշումներին ի պատասխան՝ Իրանի Իսլամական Հանրապետության արտաքին գործերի նախարարը ընդգծել է, որ Բեռլինը, որը մի ժամանակ Եվրոպայի առաջընթացի շարժիչն էր, այսօր սխալ քաղաքական որոշումներով դարձել է Եվրոպայի հետընթացի գործոնը։
Pars Today- փոխանցմամբ՝ Իրանի արտաքին գործերի նախարար Աբբաս Արաղչին X սոցիալական ցանցում , անդրադառնալով վերջին տարիներին Գերմանիայի մոտեցման փոփոխությանը, գրել է. Գերմանիան, որը մի ժամանակ Եվրոպայի առաջընթացի շարժիչն էր, այսօր դարձել է այս մայրցամաքի հետընթացի շարժիչը։ Նրա խոսքով՝ անցյալ տարվա հոկտեմբերին Նյու Յորքում կայացած հանդիպումների ժամանակ երեք եվրոպական երկրները, Գերմանիայի կանցլեր Մերցի դրդմամբ, հրաժարվել են միջուկային բանակցություններում իրենց դերից և ընտրել են Իրանի դեմ ՄԱԿ-ի պատժամիջոցների վերականգնման ուղին։
Արտգործնախարարը հավելել է. «Այժմ, երկխոսության ուղուց հրաժարվելուց հետո, նույն անձը արտահայտում է իր ցանկությունն ու պնդումը՝ վերադառնալ միջուկային բանակցություններին. մոտեցում, որը արտացոլում է Գերմանիայի արտաքին քաղաքականության մեջ առկա հստակ հակասությունը»։
Արաղչին նաև անդրադառնալով Գերմանիայի կանցլերի նախկին դիրքորոշումներին տարածաշրջանային զարգացումների վերաբերյալ` նշեց. «Իրանցիները բազմիցս ականատես են եղել նրա քաղաքական անհասունության և անպատշաճ վարքագծի դրսևորումներին, այդ թվում՝ 2025 թվականի հունիսին, երբ սիոնիստական ռեժիմի հանցագործություններից և հազարից ավելի իրանցիների նահատակությունից հետո նրա արձագանքը ուղեկցվել է ուրախությամբ»։ Արտաքին գործերի նախարարի խոսքով՝ Իրանի մոտալուտ փլուզման մասին բազմիցս հնչող պնդումները նույնպես գնահատվում են նույն շրջանակներում։
Իր ուղերձի վերջին մասում, առանձնացնելով Գերմանիայի կառավարության դիրքորոշումները այս երկրի ժողովրդի դիրքից , նա նշել է. «Գերմանացի ժողովուրդը մեծ, աշխատասեր և նորարար ազգ է, որը արժեքավոր ծառայություններ է մատուցել մարդկությանը, և Իրանի Իսլամական Հանրապետությունը միշտ ցանկացել է ամուր և կառուցողական հարաբերություններ Գերմանիայի հետ։ Այնուամենայնիվ, նման անձի ներկայությունը որպես Գերմանիայի ներկայացուցիչ համաշխարհային ասպարեզում ցավալի է, և հույս կա, որ ավելի իմաստուն և պատասխանատու քաղաքական ղեկավարություն կրկին կվերադառնա այս երկիր»։
