Avropa Şurası Azərbaycana sanksiya qoymağı planlaşdırır

Azərbaycan Respublikasının Avropa Şurası Parlament Assambleyasındakı nümayəndə heyətinin səlahiyyətləri məhdudlaşdırıla bilər.

Bazar ertəsi AŞPA-nın qış sessiyasının açılış günü Azərbaycanın nümayəndə heyətinin etimadnaməsi təsdiqlənməyib.

Azərbaycanın nümayəndə heyətinin etimadnaməsinin təsdiqlənməməsi təklifini Almaniya nümayəndə heyətindən deputat Frank Şvabe verib.

O buna səbəb kimi Azərbaycanda siyasi məhbuslar məsələsinin bu günədək öz həllini tapmadığını, Qarabağdan erməni sakinlərin zorakılıqla çıxarılmasını və 7 fevral prezident seçkilərində AŞPA-nın seçki müşahidəsinə dəvət edilməməsini göstərib.

Onun bu təklifi Assambleyanın azı 30 üzvü tərəfindən dəstəklənib.

Müzakirələrdə Azərbaycan nümayəndə heyətinin AŞPA-dan kənarlaşdırılması və ya fəaliyyətlərinin məhdudlaşdırılmasına dair qərar veriləcək.