Փաշինյանի հրաժարականի պահանջով հավաքը մեկնարկեց ՀՀ պետական օրհներգով
«Անկախության շարժում» նախաձեռնությունը Երևանի Հանրապետության հրապարակում ՀՀ պետական օրհներգով մեկնարկեց ՀՀ վարչապետ Նիկոլ Փաշինյանի հրաժարականի պահանջով հանրահավաքը։
Նախաձեռնության հեղինակը ՍԴ աշխատակազմի նախկին ղեկավար Էդգար Ղազարյանն է։ Մինչ հանրահավաքը նա լրագրողների հետ զրույցում նշեց, որ նախատեսում է այսօր հանդիպել ՀՀ վարչապետ Նիկոլ Փաշինյանին։ Օրերս Ղազարյանը հայտարարել էր, որ ընդդիմադիր շարժման ակցիաները մեկնարկում են օգոստոսի 23-ին` Անկախության հռչակագրի ընդունման օրը։
Հայտարարվեց լռության րոպե` ի հիշատակ արցախյան 3 պատերազմներում զոհված զինծառայողների և կամավորականների։
Հանրահավաքին առաջինը ելույթ ունեցավ Արցախյան 44-օրյա պատերազմում զոհված 19-ամյա, հրետանավոր Հայկ Մելիքյանի մայրը` Նաիրա Մելիքյանը։ Նա նշեց, որ իր որդին ու մարտկոցի 20 զինվոր զոհվել են հրամկազմի ստեղծած քաոսի, համատարած դավաճանության հետևանքով։ Նա շեշտեց, որ որդու և նրա ծառայակից ընկերների զոհվելու մասին լուրն իմացել է 2020 թվականի հոկտեմբերի 12-ին, 14 ամիս շարունակ փնտրել են իրենց երեխաներին։
«Մեր տղաներն արդեն զոհվել են։ Ցավոք, նրանց համար այլևս ոչինչ չենք կարող անել, բայց մենք պետք է պայքարենք ապրողների համար, որպեսզի նրանք հայրենիք ունենան։ Ես անցել ու անցնում եմ դժոխքի միջով ամեն օր, չեմ ուզում, որ նույնը կրկնվի ձեր երեխաների հետ։ Այս թուրքական իշխանությունն ամեն օր հանձնում է մեր հայրենիքի մի մասը։ Մենք վերջապես պետք է դասեր քաղե՞նք մեր պատմությունից ու ապացուցենք, որ ազգ ենք, ոչ թե խառնամուխ»,– նշեց Մելիքյանի մայրը։
Էդգար Ղազարյանն էլ իր ելույթում ընդգծեց` կառավարության շենքում ապօրինի գտնվող անձը (նկատի ունի ՀՀ վարչապետ Նիկոլ Փաշինյանին. խմբ.), որը խաբեությամբ զավթել է հայ ժողովրդի իշխանությունը, պետք է վռնդվի։
Ղազարյանը օրեր առաջ հայտնել էր, որ հանրահավաքների միջոցով մտադիր են մինչև սեպտեմբերի 21-ը` ՀՀ անկախության օրը, հասնել Նիկոլ Փաշինյանի հրաժարականին։
