Հայաստանի և Եվրամիության պաշտոնյաների հանդիպումը
Երևանի և Եվրամիության պաշտոնյաները քննարկել են Հայաստանի անվտանգության իրավիճակը։
Լեռնային Ղարաբաղի տարածաշրջանի վրա Ադրբեջանի Հանրապետության վերջին հարձակումից հետո (սեպտեմբերի 19-ին) այս տարածաշրջանում ապրող մեծ թվով հայեր իրենց հայրենիքը լքել և արտագաղթել են Հայաստան՝ վախենալով էթնիկ զտումների քաղաքականության իրականացումից։
Վերջին տվյալների համաձայն՝ Լեռնային Ղարաբաղից բռնի տեղահանված 100 հազար 632 անձ է ժամանել Հայաստան:
Հայաստանի Հանրային ռադիոյի հաղորդմամբ,հոկտեմբերի 4-ին ՀՀ անվտանգության խորհրդի քարտուղար Արմեն Գրիգորյանը հանդիպել է Հայաստանում Եվրոպական Միության պատվիրակության ղեկավար, արտակարգ և լիազոր դեսպան Վասիլիս Մարագոսի հետ: Զրուցակիցները մտքեր են փոխանակել Հայաստանի Հանրապետության շուրջ ստեղծված անվտանգային իրադրության և Ադրբեջանի կողմից ռազմական հարձակման հետևանքով Լեռնային Ղարաբաղի հայության բռնի տեղահանության հետևանքով ստեղծված իրավիճակի շուրջ:
Հայաստանի վարչապետ Նիկոլ Փաշինյանն այսօր մեկնել է Իսպանիա՝ մասնակցելու Եվրոպական քաղաքական համայնքի երրորդ գագաթնաժողովին։
Փաշինյանը Գրանադայում (Իսպանիա) կհանդիպի եվրոպական որոշ երկրների ղեկավարների հետ:
Ֆրանսիայի նախագահ Էմանուել Մակրոնը, Գերմանիայի կանցլեր Օլաֆ Շուլցը և Եվրոպական խորհրդի նախագահ Շառլ Միշելը մասնակցելու են Եվրոպական քաղաքական համայնքի երրորդ գագաթնաժողովին։