SOCAR Petroleum նավթաբազայում հրդեհ և պայթյուն է տեղի ունեցել
Ադրբեջանի արևմուտքում գտնվող Ղազախի շրջանում չորեքշաբթի օրը պայթյունով ուղեկցվող հրդեհ է բռնկվել «SOCAR Petroleum» ՓԲԸ-ին (Ադրբեջանի պետական նավթային ընկերության՝ SOCAR-ի դուստր ձեռնարկություն) պատկանող նավթաբազայում:
«Միջադեպը տեղի է ունեցել «SOCAR Petroleum» ընկերության թիվ 7 նավթաբազայի տարածքում: Պայթյունը տեղի է ունեցել վառելիք տեղափոխող ավտոմեքենայի լիցքավորման գործընթացում: Հրշեջների օպերատիվ գործողությունների շնորհիվ հաջողվել է կանխել կրակի տարածումը, սեղմ ժամկետներում տեղայնացնել այն և ամբողջությամբ մարել հրդեհը», - ասված է ընկերության սոցիալական ցանցերում տարածած հաղորդագրության մեջ:
Ընկերությունը հայտնել է, որ պատահարի հետևանքով զոհվել է նավթաբազայի աշխատակիցը, ով աշխատում էր որպես զտիչ-լիցքավորող:
Ներկայումս պարզվում են հրդեհի առաջացման պատճառները:
