Իրանը և Ադրբեջանն ընդգծել են Հյուսիս-Հարավ միջանցքի կարևորությունը
Ադրբեջանի նախագահի արտաքին քաղաքականության հարցերով խորհրդական Հիքմեթ Հաջիևն այսօր (կիրակի) Թեհրան կատարած այցի ընթացքում հանդիպել և զրուցել է Իրանի Իսլամական Հանրապետության Ազգային անվտանգության բարձրագույն խորհրդի քարտուղար Ալի Աքբար Ահմադիանի հետ։
ԻՍՆԱ-ի հաղորդմամբ՝ այս հանդիպումից հետո Հաջիևը «X» սոցիալական ցանցում գրել է. «Այս հանդիպմանը, որպես Բաքվում կայացած բանակցությունների շարունակություն, մտքեր փոխանակեցինք երկու երկրների միջև քաղաքական, տնտեսական համագործակցության և տարածաշրջանային անվտանգության հարցերի շուրջ, հատկապես ընդգծվեց Հյուսիս-Հարավ տրանսպորտային միջանցքի կարևորությունը»։
Ադրբեջանի այս բարձրաստիճան պաշտոնյան, ով այժմ գտնվում է Թեհրանում, շաբաթ օրը հանդիպել է Իրանի նախագահի քաղաքական խորհրդական Մեհդի Սանայիի հետ։ Հանդիպման ընթացքում քննարկվել են երկկողմ հարաբերությունների ամրապնդմանն ու տարածաշրջանային համագործակցությանն առնչվող հարցեր։ Նրանք հատկապես կենտրոնացել են վստահության ձևավորման և թյուրիմացությունների վերացման, դիվանագիտությունից դուրս համագործակցության ընդլայնման և տնտեսական ու առևտրային հարաբերությունների ամրապնդմանն առնչվող թեմաների վրա:
Այս հանդիպումն իրականացվել է Իրանի նախագահի քաղաքական խորհրդականի հրավերով։