ՀՀ դեսպան ու Իրանի ԳՇ պետի տեղակալը քննարկել են տարածաշրջանում տիրող իրավիճակը
Դեսպան Գրիգոր Հակոբյանը հանդիպել է ԻԻՀ գլխավոր շտաբի պետի՝ միջազգային հարցերով տեղակալ, բրիգադի գեներալ Մոհամմադ Ահադիի հետ
Իրանցի բարձրաստիճան զինվորականը կրկին հայտարարել է, որ Թեհրանն աջակցում է Հայաստանի տարածքային ամբողջականությանը:
. Իրանում Հայաստանի դեսպան Գրիգոր Հակոբյանը և Իրանի գլխավոր շտաբի պետի տեղակալ, բրիգադի գեներալ Մոհամմադ Ահադին երկկողմ օրակարգին ու տարածաշրջանում տիրող իրավիճակին առնչվող հարցեր են քննարկել։ Տեղեկությունը հայտնում է Իրանում ՀՀ դեսպանությունը։
Իրանցի գեներալը հանդիպման ժամանակ հայտարարել է, որ հարևանների հետ հարաբերությունները խորացնելու քաղաքականության շրջանակում Թեհրանի համար առանձնակի նշանակություն ունի կապերի ՀՀ–ի հետ կապերի զարգացումը: Նա վերահաստատել է ՀՀ տարածքային ամբողջականության վերաբերյալ Թեհրանի հստակ ու անփոփոխ դիրքորոշումը:
Հայ դիվանագետն իր հերթին ներկայացրել է ՀՀ կառավարության` տարածաշրջանային խաղաղությանն ու կայունությանը միտված ջանքերը և նշել, որ այդ համապատկերում առանձնահատուկ տեղ է զբաղեցնում հարաբերությունների առավել խորացումը հարևան ու բարեկամ Իրանի հետ:
Հիշեցնենք` փետրվարի 6-ին Իրանի դեսպան Մեհդի Սոբհանին հայտնել էր, որ Հայաստանն ու Իրանն աշխատում են համապարփակ ռազմավարական փաստաթղթի վրա:
Իրանի պաշտոնական անձինք բազմիցս հայտարարել են, որ դեմ են տարածաշրջանում սահմանների ցանկացած փոփոխության: Ինչպես հայտնի է, Ադրբեջանն ու Թուրքիան արդեն մի քանի տարի փաստացի պնդում են, որ Նախիջևանի և Ադրբեջանի միջև ցամաքային կապ հաստատելու նպատակով իրենց արտատարածքային միջանցք տրամադրվի ՀՀ Սյունիքի մարզի տարածքով։