«Քարար» տանկը՝ Իրանի ժամանակակից զրահատանկային տեխնոլոգիաների զարգացման խորհրդանիշ

Վերջին տարիներին Իրանի պաշտպանության նախարարության Պաշտպանական արդյունաբերության կազմակերպությունը զգալի առաջընթաց է գրանցել ռազմական և սպառազինության ոլորտում ինքնաբավության ապահովման ուղղությամբ՝ նախագծելով և արտադրելով տարբեր տեսակի զրահապատ և ոչ զրահապատ ռազմական մեքենաներ։

Այս ոլորտում ամենանշանակալի ձեռքբերումներից մեկը «Քարար» մարտական տանկի նախագծումն ու արտադրությունն է, որը համարվում է Իրանի զրահատանկային արդյունաբերության կարևորագույն նվաճումներից։

Նախագծումն ու արտադրության մեկնարկը
«Քարար»-ը համարվում է Իրանում ամբողջությամբ նախագծված առաջին ժամանակակից հիմնական մարտական տանկը։ Այն մշակվել և կառուցվել է Իրանի պաշտպանության նախարարության Պաշտպանական արդյունաբերության կազմակերպության կողմից ընդամենը երեք տարվա ընթացքում։ Տանկը պաշտոնապես ներկայացվել է 2017 թվականի սեպտեմբերի 12-ին, իսկ նույն օրը Լորեստան նահանգի Դորուդ քաղաքում գտնվող «Բանի Հաշեմ» զրահատեխնիկայի գործարանում մեկնարկել է դրա սերիական արտադրությունը։

Տեխնիկական հնարավորություններ
«Քարար»-ը համալրված է նոր սերնդի, կատարելագործված կառուցվածքով շարժիչով, որի հզորությունը գնահատվում է 1000-1200 ձիաուժ։
Կրակի կառավարման համակարգի առումով տանկն օգտագործում է երրորդ սերնդի համակարգչային կրակի կառավարման համակարգ, որն ապահովում է բարձր ճշգրտությամբ նշանառություն և թիրախների խոցում։ Հրաձիգի դիտարկման և նշանառության համակարգը ներառում է ինչպես T-72 տանկի գիշերային նշանառության համակարգը՝ որպես օժանդակ միջոց, այնպես էլ Իրանի էլեկտրոնային արդյունաբերության կողմից մշակված բազմաֆունկցիոնալ դիտարկման և նշանառության հիմնական համակարգը։

Սպառազինություն
«Քարար»-ը կարող է կիրառել տարբեր տեսակի զինամթերք՝ խոցելով բազմազան թիրախներ։ Տանկի վրա տեղադրված է նաև հեռակառավարվող գնդացիր, որը անձնակազմը կառավարում է տանկի ներսից՝ առանց բաց տարածք դուրս գալու։
Այսպիսի հեռակառավարվող մարտական մոդուլներն այսօր լայնորեն կիրառվում են աշխարհի առաջատար տանկերի և զրահամեքենաների վրա։ Դրանք ապահովում են 360 աստիճան պտույտ, ինչը հնարավորություն է տալիս արդյունավետ պայքարել հետևակի և թեթև զրահապատ թիրախների դեմ։

Ժամանակակից կառավարման և պաշտպանության համակարգեր
Տանկի ներսում տեղադրված են մի քանի թվային էկրաններ, որոնք հնարավորություն են տալիս անձնակազմին իրականացնել շրջապատի մշտադիտարկում, ինչպես նաև արդյունավետ նշանառություն իրականացնել ցերեկային և գիշերային պայմաններում՝ անկախ եղանակային իրավիճակից։ Առկա են նաև թվային նավիգացիոն համակարգի և տանկի տեխնիկական վիճակի վերահսկման առանձին ցուցադրման վահանակներ։
«Քարար»-ի պաշտպանական համակարգերի կարևոր բաղադրիչներից է իրանական արտադրության լազերային ճառագայթման նախազգուշացման համակարգը։ Այն հայտնաբերում է հակառակորդի լազերային հեռաչափերի կամ լազերային կառավարվող սպառազինության ճառագայթումը, նախազգուշացնում անձնակազմին և ավտոմատ կերպով գործարկում ծխային նռնակները՝ ստեղծելով քողարկող ծխային վարագույր, որը նվազեցնում է լազերային կառավարվող զինատեսակների արդյունավետությունը։

Գոյատևման և մարտունակության բարձր մակարդակ
«Քարար»-ը համալրված է նաև հատուկ ծածկույթներով, որոնք նվազեցնում են դրա ջերմային տեսանելիությունը՝ դժվարացնելով հայտնաբերումը ջերմատեսիլ համակարգերով։
Զրահապաշտպանության տեսանկյունից տանկը նախատեսված է դիմակայելու հակատանկային տարբեր զինատեսակների ազդեցությանը։ Այն կիրառվում է նաև բազմասպեկտր քողարկման համակարգ, որը նվազեցնում է տեսանելիությունը տարբեր հայտնաբերման միջոցների համար։
Տանկի մյուս առանձնահատկություններն են ժամանակակից կապի միջոցները, մարտադաշտի թվային կառավարման համակարգը և էլեկտրոնային պատերազմի պայմաններում արդյունավետ գործելու հնարավորությունը, որոնք «Քարար»-ին դարձնում են Իրանի նոր սերնդի զրահատանկային տեխնոլոգիաների առավել նշանակալի օրինակներից մեկը։