Իրանի ԱԳՆ․ ԱՄՆ-ի գործողությունները ակնհայտ պատերազմական հանցագործություն են

Իրանի ԱԳՆ-ն հայտարարել է, որ ԱՄՆ բանակի կողմից երկրի հարավային առափնյա նահանգների մի շարք շրջանների, ինչպես նաև Մաշհադի երկաթուղային ուղղության վրա գտնվող երկու կամուրջների նկատմամբ իրականացված հարվածները պատերազմական հանցագործության ակնհայտ դրսևորում են։

 
Ինչպես հաղորդում է Pars Today-ը՝ հղում անելով Իրանի պետական հեռուստառադիոընկերությանը, նախարարությունը խստորեն դատապարտել է հինգշաբթի վաղ առավոտյան իրականացված հարվածները՝ ընդգծելով, որ Իրանի ժողովուրդը վճռական է պաշտպանելու երկրի տարածքային ամբողջականությունը, ինքնիշխանությունն ու ազգային անվտանգությունը։
Գերատեսչության հայտարարության համաձայն՝ վերջին 48 ժամվա ընթացքում ԱՄՆ-ի իրականացրած հարձակումները, որոնք, Վաշինգտոնի պնդմամբ, պատասխան էին Հորմուզի նեղուցում երեքշաբթի տեղի ունեցած՝ մի քանի նավերի մասնակցությամբ միջադեպերին, խախտում են ոչ միայն ՄԱԿ-ի կանոնադրության 2-րդ հոդվածի 4-րդ կետը, այլև պատերազմի ավարտի վերաբերյալ փոխըմբռնման հուշագրի 1-ին և 5-րդ դրույթները։ Թեհրանը պնդում է, որ այդ գործողությունները ևս մեկ անգամ վկայում են ԱՄՆ-ի կողմից հիշյալ համաձայնության շարունակական չկատարման մասին։
Հայտարարության մեջ նշվում է նաև, որ այն պայմաններում, երբ Իրանի ժողովուրդը հեղափոխության «նահատակ առաջնորդի» հրաժեշտի արարողությանը մասնակցելով ցուցադրել է իր համախմբվածությունն ու պատրաստակամությունը պաշտպանելու երկրի անկախությունն ու տարածքային ամբողջականությունը, ԱՄՆ ղեկավարությունը դիմել է ռազմական գործողությունների, այդ թվում՝ թիրախավորելով Մաշհադ տանող երկաթուղային ենթակառուցվածքը։
Իրանի արտաքին գործերի նախարարությունը նաև դատապարտել է ԱՄՆ նախագահի և ամերիկացի այլ պաշտոնյաների հայտարարությունները՝ դրանք որակելով վիրավորական, և նշել, որ նրանց խոստովանությունը՝ պատերազմի ավարտի վերաբերյալ հուշագրին չհետևելու մասին, վկայում է Վաշինգտոնի կողմից ստանձնած պարտավորությունների խախտման և, Թեհրանի գնահատմամբ, պատերազմական քաղաքականության շարունակման մասին։