Փեզեշքիան․ Իրանը չի հանձնվի ԱՄՆ-ի եւ սիոնիստական ռեժիմի ճնշումներին
Իրանի նախագահը, ընդգծելով ԱՄՆ-ի եւ սիոնիստական ռեժիմի դավադրություններին դիմակայելու անհրաժեշտությունը, հայտարարել է, որ կառավարությունը, ապավինելով ժողովրդի աջակցությանը, կդիմադրի ռազմական եւ տնտեսական ճնշումներին եւ թույլ չի տա թշնամիներին հասնել իրենց նպատակներին։
Pars Today-ի հաղորդմամբ՝ Իրանի նախագահ Մասուդ Փեզեշքիանը կառավարության տեղեկատվության խորհրդի ութերորդ նիստում հայտարարել է, որ Իրանի դեմ ռազմական ագրեսիայի, տնտեսական պատժամիջոցների եւ տեղեկատվական պատերազմի հիմնական նպատակը պառակտում առաջացնելն ու ազգային միասնությունը թուլացնելն է։ Նա ընդգծել է հասարակական համախմբվածության ամրապնդման անհրաժեշտությունը։
Անդրադառնալով պատերազմի եւ տնտեսական շրջափակման հետեւանքով առաջացած խնդիրներին՝ Փեզեշքիանը նշել է, որ կառավարությունը, օգտագործելով երկրի հնարավորությունները, առաջնահերթություն է համարում առաջին անհրաժեշտության ապրանքների մատակարարումն ու բնակչության կենսապահովման պայմանների պահպանումը։ Նա նաեւ ընդգծել է, որ արտաքին սպառնալիքներին դիմակայելու հիմնական գործոններն են հանրային վստահությունն ու ժողովրդի մասնակցությունը։
Նախագահը, կարեւորելով ճնշման պայմաններում երկրի դիմակայունության բարձրացումը, խնդիրների հաղթահարման ուղիների թվում նշել է ժողովրդի մասնակցությունը, ներքին արտադրության զարգացումն ու էներգիայի սպառման կառավարումը։
Փեզեշքիանը նաեւ հայտարարել է, որ խնայողության ծրագրերի իրականացման եւ ժողովրդի աջակցության շնորհիվ Իրանը դադարել է բենզին ներմուծելու անհրաժեշտություն ունենալ։ Նրա խոսքով՝ այս ձեռքբերումը թույլ է տվել խուսափել վառելիքի ներմուծման համար շուրջ 12 միլիարդ դոլար ծախսելուց։
Նա նաեւ ընդգծել է լրատվամիջոցների դերը ազգային միասնության ամրապնդման, հանրային վստահության բարձրացման եւ թշնամիների հոգեբանական պատերազմին հակազդելու գործում։