Մեկնաբանություն. Միջաֆղանական բանակցություններն Աֆղանստանի մարտահրավերները հաղթահարելու միակ ելքն են
Թեհրանում միջաֆղանական բանակցությունների հիման վրա տեղի ունեցան Իրանական և աֆղանական պատվիրակությունների եռակողմ բանակցությունները՝ Աֆղանստանում խաղաղություն հաստատելու նպատակով:
Իրանի արտաքին գործերի նախարար Մոհամադ Ջավադ Զարիֆն իր թվիթերյան միկրոբլոգում նշելով, որ Թեհրանը կանգնած է աֆղան ժողովրդի կողքին, գրել է.«Իրանի արտգործնախարարությունը չորեքշաբթի օրը հյուրընկալել է Աֆղանստանի բարձրաստիճան ներկայացուցիչների հետ բարեկամական ու բովանդակալից բանակցությունները»:
Թեհրանյան բանակցություններում Աֆղանստանի քաղաքական պատվիրակությունը նախագահում էր այդ երկրի Ներքին գործերի նախկին նախարար Յունես Ղանունին, Թալիբան խմբի բանակցող պատվիրակությունը նախագահում էր խմբավորման գրասենյակի ղեկավար տեղակալ Աբբաս Ստանիկզայը:
Լինելով Աֆղանստանի հարևան երկիր և ունենալով երկար սահման այդ երկրի հետ, Իրանը հատուկ ուշադրություն է դարձնում Աֆղանստանում տեղի ունեցող զարգացումներին, քանի որ Իրանի և Աֆղանստանի ժողովրդի մշակութային, լեզվական և կրոնական ընդհանրությունների բերումով, այդ երկրի զարգացումները կարևոր են Իրանի համար:
Իրանի և Աֆղանստանի ժողովուրդների լավ հարաբերությունները, Աֆղանստանի քաղաքացիների հաճախակի այցերը Իրան և ավելի քան 4 տասնամյակ Իրանում աֆղան ներգաղթյալների ներկայությունը պատճառ են դարձել, որ աֆղաններն Իրանի Իսլամական Հանրապետությունը համարեն իրենց երկրորդ հայրենիքը:
Երկու ժողովուրդների խոր կապվածությունը պատճառ է դարձել, որ Իրանը միջաֆղանական բանակցությունների շրջանակներում հետևի Աֆղանստանի քաղաքական և անվտանգության զարգացումներին, հարգելով այդ երկրի ժողովրդի և կառավարության տեսակետներն ու շահերը:
Թեհրանի եռակողմ բանակցություններին մասնակցելու համար, Աֆղանստանի կառավարության, ինչպես նաև Թալիբանի խմբի պատվիրակություններին հրավիրելը ցույց է տալիս Իրանի ուշադրությունն ու հարգանքն Աֆղանստանում բոլոր քաղաքական խմբերի նկատմամբ:
Իրանը համոզված է, որ Աֆղանստանի ղեկավարների և տարբեր քաղաքական հոսանքների համար լավագույն ելքը միջաֆղանական բանակցային սեղանի շուրջ վերադարձն է և քաղաքական մեխանիզմների իրագործումը: Այս համատեքստում տեղի ունեցավ Թեհրանի համաժողովը, որի նպատակն էր թափ հաղորդել աֆղանական տարբեր խմբերի միջև բանակցությունների գործընթացին՝ Աֆղանստանում առկա հակամարտությունները հաղթահարելու և ճգնաժամերը կարգավորելու համար:
Ինչպես նշել է ԻԻՀ արտաքին գործերի նախարարը. «Աֆղանստանից օտարերկրյա զորքերի դուրսբերմամբ, այդ երկրում այլևս ոչ մի խոչընդոտ չի մնա և բոլոր քաղաքական հոսանքները կկարողանան գալիք սերնդի համար խաղաղ և բարեկեցիկ ապագա կերտել»:
Հաշվի առնելով Աֆղանստանի տարբեր էթնիկ խմբերը, Աֆղանստանի քաղաքական և անվտանգության զարգացումներին վերաբերող ցանկացած բանակցություններում, այդ էթնիկ խմբերի ներկայացուցիչների դերակատարությունը շատ կարևոր է և այս շրջանակում է իմաստավորվում Թալիբանի քաղաքական պատվիրակության այցը Թեհրան:
Աֆղանստանի բոլոր քաղաքական խմբերը տուժել են այդ երկրում ԱՄՆ ռազմական ներկայության պատճառով և Աֆղանստանի տարբեր էթնիկ խմբերը չեն վստահում Միացյալ Նահանգներին: Սա ընդգծում է Աֆղանստանի իսկական բարեկամների, հատկապես Իրանի աջակցությամբ միջաֆղանական բանակցությունների շարունակման կարևորությունը` կայուն խաղաղության և անվտանգության ներքո բարեկեցիկ Աֆղանստան կերտելու համար: Այդ պատճառով, Իրանի արտգործնախարարը բովանդակալի է գնահատել Թեհրանում կայացած Աֆղանստանի բարձրաստիճան ներկայացուցիչների հետ բանակցությունները:
Միջաֆղանական երկխոսության սկզբունքի վրա հիմնված խաղաղ լուծման նկատմամբ Աֆղանստանի բոլոր քաղաքական խմբերի հավատը այդ երկրում առկա մարտահրավերները հաղթահարելու և տևական խաղաղության հասնելու միակ ելքն է:
