Մամուլի տեսություն 28.10.2022
Հետազոտողները կարծում են, որ կեղծ ժպիտը կարող է դրական ազդեցություն ունենալ մեր տրամադրության վրա. Որովհետև ժպտացող մարդիկ մտածում են, թե երջանիկ են:
Էթեմադ օրաթերթ
Ռուսաստանը սպառնացել է պատերազմ սկսել Սթարլինքի դեմ
Մինչ Ուկրաինայի բարձրաստիճան պաշտոնյաները հայտարարում են, որ ռուսական բանակը շարունակում է այդ երկրի ենթակառուցվածքների ռմբակոծությունը, Կրեմլը հայտարարել է արևմտյան արբանյակները թիրախավորելու հնարավորության մասին։
Հինգշաբթի օրը ՌԴ կառավարության բարձրաստիճան պաշտոնյան հայտարարել է, որ չի բացառվում, որ Մոսկվան կարող է թիրախավորել արևմտյան երկրների առևտրային արբանյակները, որոնք կասկածվում են Ուկրաինայի ռազմական գործողություններում օգտագործվելու մեջ:
ԱՄՆ-ի կամ Արևմուտքի առևտրային արբանյակների մշակողները դեռևս որևէ կերպ չեն արձագանքել այս հայտարարությանը:
Իրան օրաթերթ
Համաշխարհային կոնտեյներային առևտրում Իրանի մասնաբաժինն աճել է
Իրանում առևտրի և տարանցման աճի համար տրանսպորտային ենթակառուցվածքների աճն ու զարգացումն օրակարգային հարց է։ Որպես բեռնափոխադրման հիմնական կենտրոններ՝ նավահանգիստները կարևորագույն դեր են խաղում երկրների առևտրում։
Իրանի հյուսիսային և հարավային նավահանգիստները նույնպես կարևոր նշանակությունն ունեն տնտեսության և հատկապես երկրի տարածաշրջանային և համաշխարհային առևտրի զարգացման ռազմավարական ծրագրում։ Իմամ Խոմեյնի նավահանգիստը հատուկ դեր ունի երկրի առևտրի, հատկապես հիմնական ապրանքների փոխադրման գործում։ Այս նավահանգստի զարգացումը նոր փուլ է թևակոխել առևտրային և տարանցիկ նպատակներին հասնելու համար։
Համշահրի օրաթոերթ
Պուտինի առողջական խնդիրների վերաբերյալ հակասական լուրեր են շրջանառվում
Օրերս հրապարակվել են լուսանկարներ, որոնցում երևում է, որ Պուտինն այցելում է բանակի զինվորներին։ Ռուսաստանի նախագահի ձեռքերին երևում են ներարկման նշաններ, որից հետո համացանցում լուրեր են տարածվել, որ նա տառապում է քաղցկեղով։
Հակառակ այս լուրերին, փորձագետները հայտարարել են, որ Պուտինի առողջությանը վտանգ չի սպառնում:
Fox News-ի բժշկական խորհրդատու դոկտոր Մարկ Սիգելն ասել է. «Պուտինի արտաքինը չի համապատասխանում քաղցկեղ ունեցողների արտաքինին: Նա թույլ կամ գունատ չէ։ Սակայն բոլոր քաղցկեղով հիվանդների արտաքինից հնարավոր չէ իմանալ, որ նրանք ունեն քաղցկեղ, թե ոչ»։
Ջամե Ջամ օրաթերթ
Կեղծ ժպիտը մարդուն ավելի երջանիկ է դարձնո՞ւմ
Հետազոտողները կարծում են, որ կեղծ ժպիտը կարող է ազդել մեր տրամադրության վրա, քանի որ այդ ժամանակ մարդիկ մտածում են, թե իրենք երջանիկ են, քանի որ ժպտում են: Թերևս ժպտալն ինքնաբերաբար ակտիվացնում է էմոցիաների հետ կապված կենսաբանական գործընթացները։ Այսպիսով, հարց է առաջանում, ե արդյոք մարդը կարո՞ղ է բարելավել տրամադրությունն ամեն առավոտ հինգ վայրկյան ժպտալով:
Հետազոտողներն ասում են. «Հնարավոր է, որ դեմքի արտահայտությունների փոփոխության հետ կապված փոքր ազդեցությունները կարող են ժամանակի ընթացքում կուտակվել և վերածվել բարեկեցության իմաստալից փոփոխությունների: Այնուամենայնիվ, մենք չպետք է շատ զարմանալի ազդեցություն ակնկալենք դրանից»:
armenpress.am
Ստոլտենբերգն սպասում է, որ ՆԱՏՕ-ի երկրները կմեծացնեն պաշտպանության ծախսերը
ՆԱՏՕ-ի գլխավոր քարտուղար Ենս Ստոլտենբերգն սպասում է, որ դաշինքի մասնակիցները 2023 թվականին կստանձնեն պաշտպանության ծախսերը մեծացնելու հստակ պարտավորություններ, տեղեկացնում է «Արմենպրես»-ը:
«Ես սպասում եմ, որ հաջորդ տարի Վիլնյուսի գագաթնաժողովում ՆԱՏՕ-ի դաշնակիցները կստանձնեն պաշտպանության բնագավառում ներդրումների մեծացման հստակ պարտավորություններ»,-Ստոլտենբերգն ասել Է Politico եվրոպական հրատարակությանը տված հարցազրույցում:
Դրա հետ մեկտեղ նա նշել Է, որ դեռեւս չափազանց վաղ Է խոսել, թե հատկապես ինչ ձեւակերպումներ կհամաձայնեցնեն դաշինքի երկրները, հաղորդել Է ՌԻԱ Նովոստին:
armenpress.am
Իլոն Մասկն ավարտին է հասցրել «Թվիթեր»- գնելու գործարքը
Միլիարդատեր Իլոն Մասկն ավարտել է «Թվիթեր»-ը գնելու գործարքը: Ինչպես հաղորդում է «Արմենպրես»-ը, այս մասին գրել է CNBC-ն:
Նշվում է, որ «Թվիթեր»-ի գործադիր տնօրեն Փարագ Ագրավալը և ֆինանսական տնօրեն Նեդ Սեգալը լքել են Սան Ֆրանցիսկոյի գլխամասային գրասենյակն ու այլևս չեն վերադառնա:
Նշվում է, որ Մասկը մինչև հոկտեմբերի 28-ը պետք է ավարտին հասցներ «Թվիթեր»-ը գնելու գործարքը, հակառակ պարագայում դատական վեճի առաջ էր կանգնելու ընկերության հետ:
armenpress.am
Սուրեն Պապիկյանը, Ավստրիայի դեսպանն ու ռազմական կցորդը քննարկել են պաշտպանության ոլորտում համագործակցության զարգացման հնարավորությունները
Հայաստանի Հանրապետության պաշտպանության նախարար Սուրեն Պապիկյանը հոկտեմբերի 28-ին ընդունել է ՀՀ-ում Ավստրիայի Հանրապետության արտակարգ և լիազոր դեսպան Ալոիս Կրաուտին և ռազմական կցորդ, գնդապետ Թոմաս Ահամմերին:
Ինչպես «Արմենպրես»-ին հայտնում են նախարարությունից, Սուրեն Պապիկյանը շնորհավորել է դեսպանին Ավստրիայի ազգային տոնի կապակցությամբ:
Դեսպանի խնդրանքով պաշտպանության նախարարը ներկայացրել է ադրբեջանական վերջին ռազմական ագրեսիայի հետևանքով ստեղծված իրադրությունը:
Հանդիպման ընթացքում քննարկվել են պաշտպանության ոլորտում հայ-ավստրիական համագործակցության զարգացման հնարավորությունները:
panorama.am
Թուրքիան ամենաշատ ապրանքներ ներմուծել է Ռուսաստանից, իսկ ամենաշատն արտահանել՝ Գերմանիա
Թուրքիայի վիճակագրական ծառայությունն ու Առևտրի նախարարությունը հրապարակել են արտահանման և ներմուծման վերաբերյալ սեպտեմբեր ամսվա վիճակագրությունը:
Վիճակագրության համաձայն՝ սեպտեմբերին արտահանումն աճել է 9.2%-ով, ներմուծումը` 38.1%-ով, փոխանցում է Էրմենիհաբերը։
Համաձայն Թուրքիայի վիճակագրական ինստիտուտի և Առևտրի նախարարության արտաքին առևտրի տվյալների՝ 2022 թվականի սեպտեմբերին նախորդ տարվա նույն ամսվա համեմատ արտահանումն աճել է 9.2%-ով և հասել 22 մլրդ 612 մլն դոլարի, ներմուծումն աճել է 38.1%-ով և կազմել 32 մլրդ 208 մլն դոլար:
Սեպտեմբերին Թուրքիայից կատարված արտահանման ծավալով առաջին տեղը զբաղեցրել է Գերմանիան։ Գերմանիա արտահանումը կազմում է 2 մլրդ 3 մլն դոլար: Համապատասխանաբար. հաջորդում են ԱՄՆ-ը՝ 1 մլրդ 378 մլն դոլար, Իրաքը՝ 1 մլրդ 277 մլն դոլար, Միացյալ Թագավորությունը՝ 1 մլրդ 205 մլն դոլար, Ռուսաստանի Դաշնությունը՝ 1 մլրդ 147 մլն դոլար։
Արտահանումը դեպի առաջին 5 տեղը զբաղեցնող երկրներ կազմել է ընդհանուր արտահանման 31%-ը։
Ներմուծման տվյալներով առաջին տեղն է զբաղեցրել Ռուսաստանի Դաշնությունը։ Սեպտեմբերին Ռուսաստանի Դաշնությունից ներմուծումը կազմել է 6 մլրդ 226 մլն դոլար: Համապատասխանաբար հաջորդում են Չինաստանը՝ 3 միլիարդ 709 միլիոն դոլար, Շվեյցարիան՝ 2 միլիարդ 129 միլիոն դոլար, Գերմանիան՝ 2 միլիարդ 37 միլիոն դոլար, ԱՄՆ-ը՝ 1 միլիարդ 512 միլիոն դոլար։ Առաջին 5 երկրներից ներմուծումը կազմել է ընդհանուր ներմուծման 48,5%-ը։
Հունվար-սեպտեմբեր ամիսներին ներմուծման մեջ առաջին տեղն է զբաղեցրել Ռուսաստանի Դաշնությունը։ Ռուսաստանի Դաշնությունից ներմուծումը կազմել է 44 մլրդ 638 մլն դոլար։
panorama.am
ՄԱԿ. աշխարհը բավականաչափ ջանքեր չի գործադրում գլոբալ տաքացման դեմ պայքարելու համար
Միավորված ազգերի կազմակերպությունը հայտարարություն է տարածել, որում նշվում է, որ աշխարհը բավարար քայլեր չի ձեռնարկում գլոբալ տաքացման դեմ պայքարելու համար։ Եվրանյուզի հաղորդմամբ, անցյալ տարի Գլազգոյում (Շոտլանդիա) ՄԱԿ-ի կլիմայի փոփոխության COP26 համաժողովի ժամանակ բոլոր երկրները համաձայնել էին վերանայել և ամրապնդել իրենց կլիմայական ծրագրերը: Սակայն 193 պետություններից միայն 24-ն են ներկայացրել իրենց թարմացված տարբերակը ՄԱԿ-ին։Մտահոգության հիմնական պատճառն այն փաստն է, որ երեք հիմնական ջերմոցային գազերի՝ ածխաթթու գազի, մեթանի և ազոտի օքսիդի մթնոլորտային մակարդակներն անցյալ տարի հասել են ռեկորդային բարձր մակարդակի:«Բոլոր երեք գազերի համար մենք կրկին նոր ռեկորդներ ենք սահմանել, ուստի մթնոլորտում դեռևս իրական բարելավում չկա: Վերջին մի քանի տարիների ընթացքում շատ երկրներում լոքդաուններ են եղել, և ածխածնի արտանետումները նվազել են, բայց այն մնում է օդում, այնպես որ մենք մթնոլորտի բարելավումներ չենք նկատել», - ասել է Համաշխարհային օդերևութաբանական կազմակերպության գլխավոր քարտուղար Պետերի Թաալասը:Համաշխարհային առաջնորդները երկու շաբաթից էլ քիչ անց կհավաքվեն Եգիպտոսում COP27 կլիմայական համաժողովին:Մեր մոլորակն արդեն տառապում է կլիմայի փոփոխության հետևանքով առաջացած փոթորիկներից, շոգից և ջրհեղեղներից, ջերմաստիճանը 1,2 աստիճանով ավելի բարձր է, քան նախաարդյունաբերական մակարդակը: ՄԱԿ-ի կլիմայի փորձագետները զգուշացնում են, որ աշխարհը պետք է ավելի արագ գործի և սահմանափակի ջերմոցային գազերի արտանետումները։
panorama.am
Փաշինյան. Հույս ունենք, որ Ռուսաստանը կսատարի իր առաջարկությունները
Նիկոլ Փաշինյանը Սոչի մեկնելուց առաջ ու Վլադիմիր Պուտինի երեկվա հայտարարություններից հետո Թվիթերի իր միկրոբլոգում ռուսերն գրառում է կատարել։
«Հայաստանը սեպտեմբերի սկզբին իր համաձայնությունն է տվել աշխատելու Հայաստանի և Ադրբեջանի միջև միջպետական հարաբերությունների հաստատման ուղղությամբ ՌԴ-ի կողմից ներկայացված սկզբունքների և պարամետրերի հիման վրա, և պատրաստ է այդ վերահաստատել Սոչիում։ Հուսով ենք, որ Ռուսաստանը կսատարի սեփական առաջարկություները»։
