Մամուլի տեսություն – 14.03.2023

Պատկերացրեք, որ Իրանը ոչ մի քայլ չձեռնարկեր ընդդեմ Ամերիկայի, ՆԱՏՕ-ի և Իսրայելի ոտնձգությունների, չկազմակերպեր երկրների ակտիվ դիմադրությունը, իսկ Արևմուտքը գերակայեր տարածաշրջանում։ Այս դեպքում Չինաստանը, Ռուսաստանը, Հնդկաստանը և մյուսները կխնդրեն Ամերիկայից նորմալ դիվանագիտական հարաբերություններ հաստատելու և մեկ բարել նավթ գնելու կամ իրենց արտադրանքի կոնտեյներ արտահանելու համար։ Բայց հիմա այս նույն կառավարությունները բանակցում են տարածաշրջանի երկրների հետ։

Վաթանե Էմրուզ օրաթերթ

Ամերիկյան սնանկության դոմինոն

Ուկրաինայի դեմ Ռուսաստանի հատուկ ռազմական գործողության մեկնարկից 2 ամիս անց Դաշնային պահուստային համակարգը որոշել է բարձրացնել տոկոսադրույքները՝ պայմանավորված համաշխարհային գնաճով։ Ելնելով դրանից՝ 2022 թվականի մայիսի կեսերին տոկոսադրույքը 0,5%-ից հասել է 1%-ի և մոտ 9 ամսում արդեն հասել 4,75%-ի։

Տոկոսադրույքի 800% աճը տեղի ունեցավ այն դեպքում, երբ որոշ ամերիկյան բանկեր չկարողացան ստեղծել այս չափի տոկոսադրույքը: Հատկապես այն բանկերը, որոնք ակտիվ էին կրիպտոարժույթների ֆինանսավորման ոլորտում և այս որոշումից հետո կորցրին իրենց շուկայի մի մասը։

Իհարկե, պետք է նաև նկատի ունենալ, որ   Միացյալ Նահանգներում տոկոսադրույքների աճի մեկ այլ պատճառ է եղել Կորոնավիրուսի ժամանակաշրջանում իրացվելիության ստեղծման հետևանքով առաջացած գնաճի զսպումը։ Ուստի, կարելի է ասել, որ ամերիկյան բանկերի շարունակական փլուզման հիմնական պատճառներից մեկը Ռուսաստանն է։

Քեյհան օրաթերթ

Սեղան, որը պատրաստել էր Իրանը. Բոլորը, բացի Ամերիկան

Անցել է վեց տարի՝ այն պահից, երբ Ամերիկայի նախագահն ասաց՝ «Արաբիան մեր կաթնատու կովն է», մինչև այն օրը, երբ «Նյու Յորք Թայմսը» գրեց, որ «Ամերիկան մնաց Իրանի, Չինաստանի և Սաուդյան Արաբիայի միջև բանակցությունների դռան հետևում»։

Թրամփի հռետորաբանությունը վիրավորական էր, բայց նա պարզապես բարձրաձայն մտածում և խոսում էր  այն մասին, թե ինչպես է Ամերիկան վերաբերվել ուրիշներին տասնամյակներ շարունակ: Թրամփն ասել է. «Արաբիան մեզ համար կաթնատու կովի պես է, երբ նա այլեւս չի կարող դոլար ու ոսկի տալ, մենք նրան մորթելու հրաման կտանք, և սա փաստ է, որ Ամերիկայի բոլոր բարեկամներն ու թշնամիները, հատկապես՝ հենց իրենք՝ Սաուդյան Արաբիայի պաշտոնյաները գիտեն: Սաուդյան Արաբիան պետք է իր հարստության երեք քառորդը վճարի Ամերիկային մեր աջակցության համար»։

Սակայն վեց տարի անց New York Times-ը հայտնում է, որ ԱՄՆ-ը հետ է մնացել Պեկինի կողմից կազմակերպված Իրան-Սաուդյան Արաբիայի բանակցություններից:

Արման Էմրուզ օրաթերթ

Իլհամ դավեր մի նյութիր

Ադրբեջանի Հանրապետության ԶԼՄ-ները վերջերս պնդում են, որ այս երկրի մի շարք քաղաքացիներ ձերբակալվել են Իրանի օգտին լրտեսության մեղադրանքով։

Փետրվարի կեսերին նման լուր հրապարակեցին Ադրբեջանի  ԶԼՄ-ները։ Այդ ժամանակ «Azerbaijan Report» ամսագիրը պնդում էր, որ Ադրբեջանի ՆԳՆ-ն երկրի մի քանի շրջաններում իր կողմից իրականացված գործողությունների ընթացքում ձերբակալել է 7 մարդու, ովքեր լրտեսել են Իրանի օգտին։

Պնդում էին, որ այդ մարդկանց թվում են SalamNews-ի և İnteraz-ի աշխատակիցները։ Ադրբեջանի Հանրապետությունը տարհանել է իր դեսպանատունը Թեհրանում զինված անձի կողմից երկրի դեսպանատան վրա հարձակումից հետո, Բաքվի իշխանությունները պնդում էին, որ այս հարձակումը ահաբեկչություն է։ Ժամանակ առ ժամանակ, Թեհրանի հետ հարաբերությունների սառեցումից հետո, Բաքուն լուրեր է հրապարակում Իրանին վերագրվող լրտեսների ձերբակալության մասին:

Շահրվանդ օրաթերթ

«Նովրուզ» գավաթը կանանց համար

Անցած օրերի ընթացքում Իրանում անցկացվել է հատուկ սպորտային մրցաշար: Նովրուզ միջազգային խաղերի առաջին փուլը, որը հատուկ` կանանց համար էր, մասնակցում էին բազմաթիվ մարզիկներ տարբեր երկրներից։

 Այս մրցումների բացման արարողությունը տեղի ունեցավ ուրբաթ երեկոյան՝ առաջին փոխնախագահ Մոհամմադ Մոխբերի, Սպորտի նախարարության և տարբեր ֆեդերացիաների ու և ավագների ներկայությամբ, իսկ մարզիկները մրցեցին տարբեր մարզաճյուղերում։

Նովրուզի միջազգային գավաթը Թեհրանում անցկացվել է 4 օրվա ընթացքում՝ ուրբաթ, շաբաթ, կիրակի և երկուշաբթի, 9 մարզաձևերում, որին մասնակցել են 22 երկրների 300-ից ավելի մարզիկներ և 200 իրանցի մարզիկներ։

armenpress.am

Փաշինյանը հավանական է համարում նոր էսկալացիան Հայաստանի սահմանին և Լեռնային Ղարաբաղում

Հայաստանի վարչապետ Նիկոլ Փաշինյանը կարծում է, որ շատ մեծ է էսկալացիայի հավանականությունը և՛ Հայաստանի սահմանի երկայնքով, և՛ Լեռնային Ղարաբաղում։

«Իմ եզրակացությունն Ադրբեջանի ավելի ու ավելի ագրեսիվ դարձող հռետորաբանությունից է և, իհարկե, կան որոշակի այլ տվյալներ»,- «Արմենպրես»-ի փոխանցմամբ, ասաց Փաշինյանը մարտի 14-ին հրավիրված ասուլիսի ժամանակ։

Նա ընդգծեց, որ Հայաստանը չէ, որ նախաձեռնում է ագրեսիվ գործողություններ ու էսկալացիա, ուստի որոշում կայացրեց այստեղ հրավիրել Եվրամիության դիտորդներին։

Փաշինյանը հայտնեց, որ 2022 թվականի հոկտեմբերին Պրահայում նախնական պայմանավորվածությունն այն էր, որ ԵՄ դիտորդներ պետք է լինեն սահմանի կամ շփման գծի երկու կողմերից՝ և՛ Հայաստանից, և՛ Ադրբեջանից։ Ընդ որում, Ադրբեջանի նախագահը համաձայնություն էր տվել այդ գաղափարին Ֆրանսիայի նախագահի և Եվրամիության խորհրդի նախագահի ներկայությամբ, սակայն ավելի ուշ, ինչպես արդեն հայտնի դարձավ, հրաժարվեց այդ տարբերակից։

armenpress.am

ԼՂ ժողովրդի իրավունքների և անվտանգության հարցը մեր առանցքային նպատակներից է. Փաշինյանն արձագանքել է Արցախի ԱԺ խմբակցությունների հայտարարությանը

Հայաստանի վարչապետ Նիկոլ Փաշինյանն անդրադարձել է Արցախի խորհրդարանական խմբակցությունների այն հայտարարությանը, որով Հայաստանի իշխանություններից պահանջում են կասկածի տակ չդնել Արցախի ինքնորոշման իրավունքը: «Արմենպրես»-ի փոխանցմամբ՝ վարչապետը թեմային անդրադարձավ մարտի 14-ի ասուլիսի ժամանակ՝ պատասխանելով «Արմենպրես»-ի հարցին, թե ինչպես կմեկնաբանի Ստեփանակերտից հնչած հայտարարությունը և կա արդյոք որևէ փաստաթուղթ կամ քննարկումներ, որով Հայաստանը կասկածի տակ կդնի Արցախի ինքնորոշման իրավունքը:

«Մենք ասել ենք և ասում ենք, որ Լեռնային Ղարաբաղի ժողովրդի իրավունքների և անվտանգության հարցը մեզ համար չափազանց կարևոր է, դա մեր առանցքային նպատակներից մեկն է: Մեր ընկալումը հետևյալն է, որ ճիշտ կլինի, որ այդ հարցի հետապնդողը, առաջնային մանդատառուն, ինչպես և կա իրականում, լինի Լեռնային Ղարաբաղի ժողովուրդը: Այս դիրքորոշման համար կան և օբյեկտիվ և սուբյեկտիվ պատճառներ: Մենք կարծում ենք, որ այդ խոսակցությունը պետք է տեղի ունենա Բաքվի և Ստեփանակերտի միջև»,- ասաց վարչապետը:

news.am

ՆԱՏՕ-ի նախկին գլխավոր քարտուղարն այսօր կլինի Ջերմուկում․ «Ազատություն»

Երկօրյա այցով Հայաստան ժամանած ՆԱՏՕ-ի նախկին գլխավոր քարտուղար Անդերս Ֆոգ Ռասմուսենն այսօր Ջերմուկ է մեկնելու՝ ծանոթանալու անցած սեպետեմբերի ռազմական գործողություններից հետո ստեղծված սահմանային իրավիճակին, հաղորդում է «Ազատություն»-ը:

Անցած տարվա ներխուժումից հետո ադրբեջանական զորքերը, ըստ պաշտոնական աղբյուրների, 4.5 կմ հեռավորության վրա են Ջերմուկից։

Վարչապետի աշխատակազմից այլ մանրամասներ չեն հաղորդում ՆԱՏՕ-ի նախկին գլխավոր քարտուղարի այցի մասին՝ տեղեկացնելով միայն, որ Հյուսիսատլանտյան ռազմական դաշինքի նախկին ղեկավարն օրվա ընթացքում ճեպազրույց կունենա լրագրողների հետ։

news.am

Վերին Շորժայում տեղակայված հայկական դիրքերի ուղղությամբ այս գիշեր իրադրությունը հարաբերականորեն կայուն է եղել

Գեղարքունիքի մարզի Վերին Շորժայում տեղակայված հայկական դիրքերի ուղղությամբ այս գիշեր իրադրությունը  հարաբերականորեն կայուն է եղել։ Այս մասին NEWS.am-ի հետ զրույցում ասաց Պաշտպանության նախարարության մամուլի քարտուղար Արամ Թորոսյանը։

Երեկ՝ մարտի 13–ին, Պաշտպանության նախարարությունը հաղորդել էր, որ ժամը 19:00-19:30-ը, Ադրբեջանի ԶՈւ ստորաբաժանումները տարբեր տրամաչափի հրաձգային զենքերից կրակ են բացել Գեղարքունիքի մարզի Վերին Շորժայի ուղղությամբ տեղակայված հայկական դիրքերի ուղղությամբ: Հայկական կողմը կորուստներ չունի:

tert.am

ԿԽՄԿ-ի միջնորդությամբ Արցախից Հայաստան է տեղափոխվել 13 անձ, 10-ը՝ հակառակ ուղղությամբ

Արցախը Հայաստանին կապող միակ ճանապարհը Ադրբեջանի կողմից արգելափակելու պատճառով ԱՀ առողջապահության նախարարության «Հանրապետական բժշկական կենտրոն» ՓԲԸ-ից ուռուցքային և սիրտ-անոթային համակարգի ծանր հիվանդություններով 13 անձ այսօր՝ մարտի 14-ին, «Կարմիր խաչի» միջազգային կոմիտեի միջնորդությամբ և ուղեկցությամբ տեղափոխվել է ՀՀ մասնագիտացված բժշկական կենտրոններ, հայտնում են ԱՀ առողջապահության նախարարությունից։

10 բուժառուներ, ովքեր պետական պատվերի շրջանակներում ուղեգրվել են ՀՀ բուժում ստանալու համար, ուղեկցողների հետ վերադարձել են Արցախ։

ԱՀ առողջապահության նախարարության ենթակայության տակ գործող բուժհաստատություններում շարունակում են դադարեցված մնալ պլանային վիրահատությունները։

«Արևիկ» բուժմիավորումում 6 երեխա գտնվում է նորածնային և վերակենդանացման բաժանմունքում:

«Հանրապետական բժշկական կենտրոն» ՓԲԸ-ում 7 բուժառու գտնվում է վերակենդանացման բաժանմունքում, որոնցից 2-ը ծայրահեղ ծանր վիճակում։

tert.am

Ադրբեջանի ՊՆ-ի հաղորդագրությունը հերթական ապատեղեկատվությունն է․ Արցախի ՊՆ

Ադրբեջանի ՊՆ տարածած հաղորդագրությունն այն մասին, թե իբր ՊԲ ստորաբաժանումները մարտի 13-ին և լույս 14- ի գիշերը կրակ են բացել Արցախի Հանրապետության Ասկերանի շրջանի օկուպացված տարածքներում տեղակայված ադրբեջանական դիրքերի ուղղությամբ, հերթական ապատեղեկատվությունն է։

Այս մասին հայտնում են Արցախի Հանրապետության պաշտպանության նախարարությունից։