Իրանն արագացնում է Ռեշտ-Աստարայի շինարարությունը «Հյուսիս-հարավ» միջանցքի համար․ Օվերչուկ
Իրանն ակտիվորեն աշխատում է Ռեշտ-Աստարա երկաթգծի կառուցման ուղղությամբ, որը տանում է դեպի Ադրբեջանի հետ սահման:
Այս մասին լրագրողներին ասել է ՌԴ փոխվարչապետ Ալեքսեյ Օվերչուկը, որը Կուալա Լումպուրում մասնակցում է Հարավարևելյան Ասիայի պետությունների ասոցիացիայի միջոցառումներին։
«Մենք առաջընթաց ենք տեսնում «Հյուսիս-հարավ» տրանսպորտային միջանցքի հարցում, այդ թվում՝ ադրբեջանական հատվածում։ Իրանում այժմ նկատելի աշխատանք է տարվում Ռեշտ-Աստարա գծի համար հողատարածքներ գնելու ուղղությամբ։ Միաժամանակ ընթանում են նախագծահետախուզական աշխատանքներ, ստեղծվել է հենակետային գեոդեզիական ցանց, պատրաստվում է վերևից լուսանկարահանում, ընթանում է շինարարության նախապատրաստման լիարժեք գործընթաց»,- նշել է Օվերչուկը։
Ավելի վաղ Ադրբեջանում կայացել էր Ռուսաստանի, Ադրբեջանի և Իրանի պատվիրակությունների եռակողմ հանդիպումը, քննարկվել «Հյուսիս-հարավ» միջազգային տրանսպորտային միջանցքի զարգացումը:
Օվերչուկի գլխավորած ռուսական պատվիրակությունն այցելել է Ադրբեջանի և Իրանի սահմանային հատված, որտեղ դիտել է շինարարական աշխատանքների ընթացքը:
Հիշեցնենք, որ խորհրդային շրջանում Իրանի հետ երկաթուղային հաղորդակցությունն իրականացվում էր Նախիջևանի ինքնավար ԽՍՀ–ի հետ սահմանին։ Ղարաբաղյան հակամարտության սկսվելուց և Ադրբեջանի կողմից Հայաստանի տրանսպորտային շրջափակումից հետո այդ երթուղին փակվել է։
Հայաստանի, ԱՄՆ-ի և Ադրբեջանի ղեկավարների՝ օգոստոսի 8-ին Վաշինգտոնում ստորագրած համաձայնագրով նախատեսվում է այդ ուղղությամբ շարժման վերսկսում՝ տարածաշրջանային կոմունիկացիաների ապաշրջափակման գործընթացի շրջանակում:
