Պուտին. Իրանի արագընթաց փոքր նավատորմը արդյունավետ գործեց ԱՄՆ-ի դեմ
Ռուսաստանի նախագահ Վլադիմիր Պուտինը, անդրադառնալով Արևմտյան Ասիայում հակառակորդների ագրեսիվ գործողությունների դեմ Իրանի արագընթաց փոքր նավատորմի արդյունավետությանը, ընդգծել է, որ նման կարողությունները պետք է զարգացվեն նաև Ռուսաստանի ռազմածովային ուժերում։
ԻՍՆԱ-ի հաղորդմամբ՝ Ռուսաստանի նախագահ Վլադիմիր Պուտինը երկրի ռազմածովային նավատորմի հրամանատարների և զինծառայողների հետ հանդիպման ժամանակ անդրադարձել է Արևմտյան Ասիայի վերջին ռազմական զարգացումներին և հայտարարել. «Տեսեք, թե այժմ ինչ է տեղի ունենում Մերձավոր Արևելքի հակամարտության գոտում․ այսպես կոչված Իրանի` «մժեղային նավատորմը» լիովին արդյունավետ է գործում»։
Պուտինը, հիշեցնելով, որ «մժեղային նավատորմի» ռազմավարությունը ռազմական նավագնացության երկար պատմություն ունի, նշել է, որ Ռուսաստանը ևս, հաշվի առնելով տարբեր ջրային տարածքներում ռազմական գործողությունների առանձնահատկությունները, պետք է զարգացնի նմանատիպ նավային ստորաբաժանումներ։
Ռուսաստանի նախագահի այս հայտարարությունը հնչել է այն բանից հետո, երբ Financial Times-ը հայտնել էր, որ Իրանի զինված ուժերի փոքր արագընթաց նավակները, որոնք հայտնի են որպես «մժեղային նավատորմ», տեղակայվել են Հորմուզի նեղուցում։ Ըստ հրապարակման՝ Թեհրանը երկրի հարավի ծոցերում, քարանձավներում և առափնյա թունելներում թաքցրել ու տեղաբաշխել է հարյուրավոր փոքր արագընթաց նավակներ։
Financial Times-ի տվյալներով՝ այդ նավակները հիմնականում զինված են թեթև սպառազինությամբ, իսկ դրանց մի մասը՝ նաև կարճ հեռահարության հրթիռներով, և խմբային գործողություններով կարողանում են ճնշում գործադրել ավելի մեծ ու դանդաղաշարժ նավերի վրա։
