Prishtina mbledh kryetarët e qyteteve shqiptare

Kryetari i Prishtinës, Shpend Ahmeti, ka treguar se për nder të dhjetëvjetorit të Pavarësisë, në kryeqytet do të mblidhen kryetarët e qyteteve shqiptare.

“Sot në dhjetëvjetorin e shpalljes së Pavarësisë së Republikës së Kosovës, Komuna e Prishtinës mirëpret kryetarët e Tiranës, Tetovës, Preshevës, Gostivarit, Fierit, Ulqinit dhe Prizrenit në takimin e dytë të Unionit të Bashkive Shqiptare”, ka shkruar Ahmeti në profilin e tij në Facebook. Ahmeti në këtë shkrim u ka uruar festën e Pavarësisë të gjithë qytetarëve të Kosovës. Me rastin e 10-vjetorit të Pavarësisë së Kosovës, Presidenti i Shqipërisë z.Ilir Meta i ka dërguar një mesazh urimi homologut të tij, Hashim Thaçi. Ndër të tjera në mesazhin e Presidentit Meta shkruhet: “Jam i entuziazmuar që marrëdhëniet tona vëllazërore dhe ndërshtetërore janë në nivelet më të larta të bashkëpunimit, dhe janë konsoliduar në shtratin e integrimeve europiane dhe euro-atlantike, përkrah partnerëve tanë strategjikë. Ju siguroj se, unë si President i Republikës, por edhe të gjitha institucionet e Shqipërisë do të jemi gjithmonë mbështetës e përkrah në ndërmarrjet tuaja të guximshme që fuqizojnë institucionet, demokracinë dhe sundimin e ligjit në Kosovë, që konsolidojnë harmoninë e bashkëjetesës gjithëpërfshirëse dhe që thellojnë bashkëpunimin ndërkombëtar të Kosovës me miqtë dhe organizatat shumëpalëshe”.