Rama: Vizat nuk rikthehen se Shqipëria s’ka shkelur asnjë kriter

Kryeministri shqiptar Edi Rama, ka qenë ndër të parët që ka reaguar pas vendimit të Komisionit Evropian për të mos rikthyer vizat për Shqipërinë.

Rama deklaroi se vizat nuk rikthehen sepse Shqipëria s’ka shkelur asnjë kriter. “Ja dhe vizat s’u rikthyen siç predikuan e trumbetuan lajmësit e qametit që s’ndodhi! Komisioni Europian e refuzoi kërkesën e qeverisë holandeze dhe e vërteta doli fiks siç ishte kur e thamë e shumëkush s’e besoi: Vizat nuk rikthehen sepse Shqipëria s’ka shkelur asnjë kriter”, u shpreh Rama. Komisioni Evropian ka hedhur poshtë kërkesën e Holandës për rikthimin e regjimit të vizave për Shqipërinë. Këtë e ka bërë të ditur ambasadori i Bashkimit Evropian në Shqipëri, Luigi Soreca. “Pas një vlerësimi të kujdesshëm të përmbajtjes së njoftimit të marrë nga Holanda dhe bazuar në informacionet dhe të dhënat e rëndësishme që kemi, Komisioni Evropian mendon se në këto rrethana nuk përmbushen kushtet për të aktivizuar mekanizimin e pezullimit të vizave”, shkroi Soreca në Twitter. Soreca theksoi se pas këtij konfirmimi tashmë Shqipëria duhet të ecë përpara dhe të drejtojë energjitë drejt integrimit të vendit në Bashkimin Evropian para se të merret vendimi në muajin tetor.