Irani shpall Forcat Detare Kanadeze "organizatë terroriste"

Pars Today – Në përgjigje të vendimit të paligjshëm të qeverisë kanadeze, Ministria e Punëve të Jashtme të Iranit njoftoi se Marina (Forcat Detare) Kanadeze i nënshtrohet Ligjit të Reciprocitetit të Iranit dhe, në përputhje me rrethanat, njihet si një organizatë terroriste brenda kornizës së këtij ligji.

Sipas Pars Today, Ministria e Punëve të Jashtme e Iranit, në një deklaratë, duke iu referuar vendimit të qeverisë kanadeze të 19 qershorit 2024, për të etiketuar një pjesë të Forcave të Armatosura të Republikës Islamike të Iranit, theksoi: “Meqenëse qeveria kanadeze, në kundërshtim me parimet themelore të së drejtës ndërkombëtare, e ka vendosur Korpusin e Gardës Revolucionare Islamike (IRGC), i cili është një nga shtyllat zyrtare të Forcave të Armatosura të Iranit, në listën e organizatave terroriste, Republika Islamike e Iranit ka vepruar bazuar në parimin e reciprocitetit”.

Në deklaratë thuhet se veprimi i Teheranit bazohet në Nenin 7 të ligjit "Kundërmasat Kundër Shpalljes së Korposit të Gardës Revolucionare Islamike si Organizatë Terroriste nga Shtetet e Bashkuara të Amerikës", të miratuar në vitin 2019; një ligj që përcakton se të gjitha vendet që në çfarëdo mënyre i binden ose e mbështesin vendimin e SHBA-së në këtë drejtim, do t'u nënshtrohen kundërmasave nga Republika Islamike e Iranit.

Prandaj, Ministria e Punëve të Jashtme e Iranit njoftoi se Marina (Forcat Detare) Kanadeze i nënshtrohet dispozitave të këtij ligji dhe njihet si organizatë terroriste brenda kuadrit të veprimeve reciproke.

Qeveria e Kanadasë ndërpreu marrëdhëniet diplomatike me Teheranin në vitin 2012 dhe vitin e kaluar, duke vazhduar politikat e saj anti-iraniane, e vendosi Korpusin e Gardës Revolucionare Islamike në listën e organizatave terroriste, një veprim që u dënua zyrtarisht nga Republika Islamike e Iranit.