Franca paralajmëron Britaninë në rast të daljes nga BE

Ministri francez i Ekonomisë, Emmanuel Macron shkaktoi polemika të mëdha kur tha se Franca mund t’u japë fund kontrolleve kufitare në Calais (Kale), nëse Britania vendos ta lërë Bashkimin Europian.

Macron nuk u mjaftua me kaq, por shtoi se, në rastin e një skenari të tillë mund të kufizohet edhe qasja në tregun e përbashkët, ndërsa bankierët e Londrës do të joshen të mendojnë zhvendosjen. Komentet e bëra, në kohën kur kryeministri britanik David Cameron përgatitej për nisjen e bisedimeve mbi emigracionin dhe sigurinë me shefin e “Elizesë”, Francois Hollande, u hodhën poshtë nga kampi prolargimit nga BE-ja, si “përpjekje për të shkaktuar panik e asgjë më shumë”. “Kjo është propagandë e pastër, e prodhuar nga qeveritë e tjera europiane me kërkesë të kryeministrit tonë, për t’i trembur njerëzit e për t’i shtyrë të votojnë kundër largimit”, u shpreh ligjvënësi konservator, Bernard Jenkin. “I takon popullit britanik dhe jo qeverisë franceze, të zgjedhë nëse Mbretëria e Bashkuar do të mbetet në vazhdimësi pjesë e bllokut europian”, shtoi ai. Edhe më i ashpër u tregua deputeti konservator, Peter Bone, edhe ky mbështetës i fushatës për shkëputje nga Bashkimi Europian. “Nëse azilkërkuesit do të fillojnë të mbërrijnë në Dover, ne do t’i kthejmë menjëherë mbrapsht”, u shpreh ai. “Si komb i pavarur jashtë BE-së do të kemi çdo të drejtë kontrolli mbi kufijtë tanë, u pëlqen apo jo francezëve”. Franca mund të vendosë në çdo moment t’i japë fund marrëveshjes dypalëshe të kufijve, por për ministrin e Brendshëm, Bernard Cazeneuve, ky do të ishte një veprim “kokëkrisur”, i cili mund të shkaktonte për më tepër edhe një katastrofë humanitare. Nga ana tjetër, Franca dhe Britania e Madhe njoftuan masat për një bashkëpunim më të ngushtë në fushat e sigurisë dhe të mbrojtjes, pas samitit dypalësh të mbajtur në qytetin verior të Amiensit. Kryeministri britanik, David Cameron, dhe Presidenti francez, Francois Hollande, bënë të ditur arritjen e një marrëveshjeje për të punuar së bashku mbi llojet e reja të avionëve të telekomanduar, apo “drone”-ve, si dhe mbi këmbimin e informacioneve të kundërzbulimit. Kjo ishte vetëm njëra anë e asaj që u diskutua, pasi kriza e emigrantëve, çështja më e rëndësishme, nuk mund të lihej jashtë konferencës së përbashkët për shtyp, përfshi këtu edhe krizën për zhvendosjen e emigrantëve nga kampi i ngritur në Calais (Kale). Në lidhje me këtë, kryeministri Cameron u shpreh: “Dua t’iu njoftoj se, ne do të investojmë një shumë shtesë prej 17 milionë paund në infrastrukturën prioritare të sigurisë në Calais, për të asistuar edhe më tej punën e policisë franceze. Paratë do të jepen në drejtim të përpjekjeve për t’i lëvizur ata njerëz nga kampi i Calais, drejt ambienteve më të përshtatshme diku tjetër në Francë”. Ndërkohë, Presidenti francez Hollande, edhe pse nuk specifikoi gjë, deklaroi se pavarësisht dëshirës së tij që Britania të qëndrojë në BE, vendi ishullor do të përballet me “pasoja” mbi emigracionin dhe ekonominë, nëse largohet nga unioni. I pyetur në lidhje me deklaratat e një ministri të kabinetit të tij, atij të Ekonomisë, dhe mbi përfundimin e mundshëm të kontrolleve kufitare britanike në Calais, Hollande u shpreh: “Nuk dua t’iu frikësoj, thjesht dua t’iu them të vërtetën: Po, do të ketë pasoja nëse Britania largohet nga BE-ja dhe këto do të jenë në shumë fusha. Qoftë në tregje jo më të përbashkëta, në këmbimet financare, në zhvillimin dhe veçanërisht atë ekonomik, mes dy vendeve tona. Kjo nuk do të thotë se do të shkatërrohet gjithçka, nuk jam këtu për të paraqitur skenare katastrofike, por do të ketë pasoja”. Hollande njoftoi gjithashtu se, udhëheqësit e Francës, Britanisë dhe Gjermanisë do të zhvillojnë një telekonferencë së bashku me Rusinë gjatë së premtes, për të diskutuar mbi situatën e fundit në Siri. Më herët gjatë ditës së enjte, Cameron dhe Hollande morën pjesë në një ceremoni nderimi për 100-vjetorin e betejës së Somme-së, gjatë Luftës së Parë Botërore, që u zhvillua në varrezat dhe memorialn britanik në Pozieres, pranë Amiensit.