Izraeli kundërshton blerjen e avionëve F-35 nga Katari

Izraeli do të kundërshtojë shitjen e aeroplanëve ushtarakë F-35 nga Shtetet e Bashkuara të Amerikës në Katar.

Sipas medieve të huaja, lajmin e konfirmoi të dielën ministri i Inteligjencës izraelite, Eli Cohen. Deklarata e Cohenit erdhi pas një raporti ku thuhej Katari kishte paraqitur kërkesë zyrtare në Washington për blerjen e këtyre aeroplanëve. I pyetur nëse Izraeli do ta kundërshtonte shitjen e aeroplanëve, Cohen tha se, “përgjigjja është po”. “Siguria dhe epërsia jonë ushtarake në rajon është një ndër parimet më kryesore për ne”, u shpreh ai. Ndryshe, në muajin gusht Katari kishte bërë kërkesë për blerjen e avionëve F-35 nga SHBA-ja, menjëherë pas marrëveshjes së arritur ndërmjet SHBA-së dhe Emirateve të Bashkuara Arabe për shitjen e këtyre avionëve Abu Dhabit.