Dimensionet dhe pasojat e vizitës së Herzogut në Turqi

Presidenti izraelit Is'hak Herzog udhëtoi për në Turqi dhe u takua me Presidentin Rexhep Tajip Erdogan. Presidenti izraelit Is'hak Herzog mbërriti në kryeqytetin turk Ankara të mërkurën e kaluar për një vizitë dy ditore.

Herzog është zyrtari i parë izraelit që viziton Turqinë që nga viti 2008. Ky udhëtim shënon rifillimin e marrëdhënieve turko-izraelite pas disa vitesh. E rëndësishme është se Turqia i kishte ndërprerë lidhjet me regjimin sionist në vitet e kaluara në mbrojtje të Palestinës dhe tani, pasi regjimi sionist ka shtuar dhunën ndaj palestinezëve, Ankaraja ka ringjallur marrëdhëniet me regjimin sionist. Prandaj, vizita e Herzogut në Turqi zemëroi grupet palestineze. Lëvizja Palestineze e Xhihadit Islamik tha në një deklaratë se vizita u bë në dritën e intensifikimit të veprimeve armiqësore sioniste kundër popullit të Jerusalemit dhe planeve të armikut për të hebraizuar vendet e shenjta dhe për të hyrë ilegalisht në xhaminë Al-Aksa. Ftesa e Erdoganit drejtuar Herzogut për të vizituar Ankaranë është një lojë e presidentit turk në fushën izraelite. Regjimi izraelit ka qenë në rrugën e normalizimit të marrëdhënieve me vendet arabe që nga shtatori 2020. Emiratet e Bashkuara Arabe, Bahreini, Sudani dhe Maroku janë katër vendet arabe që kanë vendosur marrëdhënie diplomatike me Izraelin. Erdogan tani është në të njëjtën rrugë. Edhe pse zyrtarët turq pretendojnë se udhëtimi ishte për qëllime ekonomike, qëllimet politike të kësaj vizite duket se janë më të rëndësishme se ato ekonomike. Rexhep Tajip Erdogan është nën presionin më të rëndë për shkak të problemeve ekonomike që kanë lindur në Turqi, veçanërisht nga rënia e fortë e vlerës së monedhës kombëtare të këtij vendi. Ftesa për Herzogun synon të lehtësojë presionin politik ndaj Erdoganit, por vizita e Herzogut në Turqi u kundërshtua nga populli turk. Protestuesit turq grisën dhe i vunë flakën një flamuri izraelit në rrugën e aeroportit të Ankarasë, duke e zëvendësuar atë me një flamur palestinez. Ky reagim i popullit turk tregon se masa të tilla si rivendosja e marrëdhënieve me regjimin izraelit nuk mund të çojnë në praktikë një rritje të popullaritetit të Erdoganit në Turqi. Një çështje tjetër është se vizita e Herzogut në Turqi është shumë e rëndësishme për regjimin izraelit. Nga njëra anë, regjimi sionist pretendon se ka zgjeruar normalizimin e marrëdhënieve dhe madje e ka shtrirë atë në vende të rëndësishme islamike si Turqia. Prandaj, ai kërkon të kundërshtojë idenë se normalizimi ka dështuar. Nga ana tjetër, regjimi izraelit, duke normalizuar apo rigjallëruar marrëdhëniet me vendet islamike, kërkon të përçojë mesazhin se ky regjim sot në rajonin e Azisë Perëndimore nuk po përballet me izolim politik, por gjendja e tij është përmirësuar. Në fund të fundit duhet thënë se normalizimi i marrëdhënieve të Izraelit me katër shtetet arabe ka çuar në një rritje të dhunës kundër palestinezëve. Rigjallërimi i marrëdhënieve me Turqinë tani mund të hapë rrugën për përshkallëzimin e mëtejshëm të dhunës, sepse në mes të dhunës, Turqia ka ringjallur marrëdhëniet me Izraelin. Prandaj, regjimi sionist tani do të vazhdojë dhunën kundër palestinezëve me një liri më të madhe.