Gjashtë grupe opozitare në Bahrein shpallin bojkotimin e zgjedhjeve

Gjashtë grupet opozitare të Bahreinit kanë shpallur bojkotimin e zgjedhjeve parlamentare dhe komunale që do të mbahen më 12 nëntor.

Shoqëria Islame Kombëtare Al-Vefak, Shoqëria Islamike e Veprimit, Partia Islamike al-Wafa'a, Koalicioni i 14 Shkurtit, Lëvizja për Lirinë e Bahreinit dhe Lëvizja Hak për Liri dhe Demokraci lëshuan një deklaratë të përbashkët, duke i përshkruar zgjedhjet si "një proces të rremë që i mungon legjitimiteti dhe përfaqësimi popullor”. Sipas gazetës Bahrain Mirror, në deklaratë thuhej: “Regjimi në Bahrein po e investon këtë proces zgjedhor për tirani të mëtejshme, autoritarizëm, konfiskimin e vullnetit popullor dhe përvetësim të pasurisë, plaçkitjen e burimeve të vendit, rritjen e taksave mbi njerëzit, normalizimin e mëtejshëm me sionistët, krimet kundër të drejtave të njeriut dhe zgjerimin e korrupsionit”. Grupet opozitare përsëritën se "i gjithë populli i Bahreinit pa përjashtim është i prekur dhe i shënjestruar në jetesën, liritë, sigurinë dhe të gjitha të drejtat e tyre për shkak të këtij procesi zgjedhor, i cili është rregulluar nga regjimi në një mënyrë që i përshtatet vetëm atij". Për më tepër, gjashtë grupet u bënë thirrje njerëzve - Shiitëve dhe Sunitëve - nga të gjitha rajonet dhe komponentët që të bojkotojnë procesin zgjedhor duke e përshkruar atë si farsë. Sipas grupeve opozitare, kjo lëvizje synon “të ruajë sovranitetin e vendit dhe ta mbrojë atë nga korrupsioni, judaizimi dhe eliminimi i identitetit kombëtar për të ardhmen e Bahreinit dhe popullit të tij”.