Fillimi i vaksinimit kundër poliomielitit në Rripin e Gazës

Agjencia e lajmeve AFP raportoi të shtunën fillimin e procesit të vaksinimit të fëmijëve kundër virusit të poliomielitit në Gaza.

Sipas marrëveshjes, sulmet e regjimit pushtues sionist do të ndalen përkohësisht dhe rajonalisht për tetë orë në ditë nga ora 6 e mëngjesit deri në orën 15:00 për t'u realizuar procesi i vaksinimit të fëmijëve në Gaza.

Ministria palestineze e Shëndetësisë njoftoi mbërritjen e vaksinave të poliomielitit të dielën e kaluar dhe kërkoi presion ndaj regjimit sionist për të siguruar kushtet për importin e këtyre vaksinave në Gaza, pasi gjeti prova të virusit shumë ngjitës të poliomielitit në sistemin e ujit dhe në sistemin e kanalizimit në Rripin e Gazës. OBSH ka dërguar më shumë se një milion doza të vaksinës së poliomielitit në Gaza.

Para disa ditësh, Shefi i politikës së jashtme të Bashkimit Evropian Josep Borrell bëri thirrje për një armëpushim të menjëhershëm tre-ditor në Gaza për të lejuar vaksinimin e fëmijëve kundër poliovirusit, përhapja e shpejtë e të cilit kërcënon qindra mijëra fëmijë në territorin e rrethuar palestinez.

Borrell paralajmëroi për një përhapje të shpejtë të virusit shumë infektiv që ishte identifikuar në mostrat e ujërave të zeza të mbledhura nga UNICEF në Khan Younis dhe Deir al Balah.

Ai në një mesazh në rrjetin X tha se sëmundja, e cila mund të shkaktojë deformime dhe paralizë, "kërcënon të gjithë fëmijët në Gaza, tashmë të dobësuar nga zhvendosja, privimi dhe kequshqyerja".

Borrell kërkoi "një armëpushim të menjëhershëm humanitar 3-ditor për të mundësuar vaksinimin nga OBSH dhe UNICEF".

Pasi gjashtë mostra të ujërave të zeza të marra në Gaza në fund të qershorit rezultuan pozitive për virusin, Organizata Botërore e Shëndetësisë paralajmëroi se ishte "vetëm çështje kohe" para se sëmundja të kapte mijëra fëmijë palestinezë.