MSF fajëson Izraelin për shpërthimin e poliomielitit në Gaza

Mjekët pa Kufij kanë lëshuar një deklaratë për shkatërrimin e vazhdueshëm të infrastrukturës dhe sistemit shëndetësor në Rripin e Gazës nga regjimi izraelit, duke fajësuar këtë regjim për përhapjen e poliomielitit në zonën e rrethuar palestineze.

“Ringjallja e poliomielitit në Gaza është pasojë e shkatërrimit të vazhdueshëm të infrastrukturës dhe sistemit shëndetësor nga forcat izraelite. Kushtet johigjienike dhe të tmerrshme të jetesës që rezultojnë, dhe mungesa e aksesit në vaksinim, mund të çojnë në përhapjen e sëmundjes”, paralajmëroi organizata ndërkombëtare Mjekët pa Kufij (MSF) në deklaratën në llogarinë e saj X.

MSF, e cila aktualisht po ndihmon OKB-në në kryerjen e vaksinimit masiv të fëmijëve palestinezë në Rripin e Gazës, shtoi: “Fushata e vaksinimit, e cila synon afërsisht 640,000 fëmijë nën 10 vjeç, është një hap pozitiv. Megjithatë, është ende një pikë në oqean në krahasim me nevojat kritike humanitare mjekësore të njerëzve në Rripin e Gazës.”

“Në Gaza, ndërsa Ministria e Shëndetësisë dhe Kombet e Bashkuara kanë nisur një fushatë të gjerë vaksinimi ndaj poliomielitit, ekipet tona do të ofrojnë mbështetje logjistike dhe organizative në pesë objekte shëndetësore në të gjithë qytetet Deir Al-Balah dhe Khan Younis, në Gaza”, tha organizata MSF.

Duke iu referuar marrëveshjes së arritur për ndalimin e përkohshëm të operacioneve ushtarake gjatë orarit të vaksinimit, deklarata shtoi: “Shpallja e pauzave ushtarake gjatë fushatës së vaksinimit nuk duhet të largojë vëmendjen nga dhuna e pamëshirshme dhe ndikimi i saj në dërgimin e ndihmave humanitare. Më pak se gjysma e spitaleve në Gaza (16 nga 36) janë funksionale ndërsa nevojat mjekësore të njerëzve janë më të mëdha se kurrë".