Vazhdojnë dënimet e masakrës së Izraelit në Mawasi

Një i dërguar i Kombeve të Bashkuara ka dënuar sulmin e fundit ajror izraelit në një kamp në Gazën jugore pranë Khan Yunis që vrau më shumë se 40 civilë të zhvendosur.

"Unë dënoj fuqishëm sulmet ajrore të sotme vdekjeprurëse nga Izraeli në një zonë me popullsi të dendur në një zonë humanitare të caktuar nga Izraeli në Khan Yunis, ku ishin strehuar njerëzit e zhvendosur," tha të martën në një deklaratë Tor Wennesland, koordinatori special i OKB-së për procesin e paqes në Lindjen e Mesme.

Më vete, Ministria palestineze e Punëve të Jashtme kritikoi dështimin e komunitetit ndërkombëtar për të ndalur fushatën gjenocidale të Izraelit në Gaza dhe tha se ky dështim i mundëson Izraelit të vazhdojë kryerjen e masakrave të mëtejshme në Mawasi dhe zona të tjera.

“Një armëpushim i menjëhershëm është mënyra e vetme për të mbrojtur civilët palestinezë dhe për të krijuar një mjedis të përshtatshëm për arritjen e një marrëveshjeje për shkëmbimin e të burgosurve”, deklaroi Ministria palestineze e Punëve të Jashtme.

Në Teheran, zëdhënësi i Ministrisë së Jashtme iraniane Naser Kanani e dënoi këtë sulm me termat më të ashpër. Ai tha se regjimi sionist nuk ka asnjë respekt për standardet ligjore dhe ndërkombëtare si dhe për parimet morale.

Në Ankara, Ministria e Jashtme e Turqisë denoncoi gjithashtu sulmin ajror vdekjeprurës izraelit, duke thënë se regjimi i Tel Avivit kishte "shtuar një krim të ri në listën e tij të krimeve të luftës".

“Ne dënojmë masakrën e Izraelit ndaj dhjetëra palestinezëve në një sulm ndaj tendave të civilëve në të ashtuquajturën ‘zonë humanitare’ në Khan Younis”, tha ministria e Jashtme turke.

Arabia Saudite, nga ana e saj, i bëri thirrje komunitetit ndërkombëtar që t'i japë fund "shkeljeve të vazhdueshme të ligjit ndërkombëtar nga Izraeli".

“Mbretëria saudite dënon fuqishëm shënjestrimin e zonës Mawasi në Khan Younis në jug-perëndim të Gazës”, thuhet në një deklaratë të Ministrisë së Jashtme saudite.

Ajo shprehu gjithashtu refuzimin e Mbretërisë saudite për vazhdimin e krimeve të gjenocidit izraelit në Gaza.