HTS kërkon tërheqjen e Izraelit nga lartësitë e pushtuara të Golanit

Administrata e HTS në Siri ka bërë thirrje për tërheqjen e Izraelit nga territori që pushtoi në Lartësitë Golan pas rënies së presidentit Bashar al-Assad në dhjetor.

Media shtetërore raportoi se shqetësimet u përcollën të mërkurën gjatë bisedimeve me shefin e paqeruajtësve të OKB-së Jean-Pierre Lacroix në kryeqytetin Damask.

Gjatë takimit të Lacroix me ministrat e rinj të jashtëm dhe të mbrojtjes të Sirisë, "u konfirmua se Siria është e gatshme të bashkëpunojë plotësisht me OKB-në", tha agjencia zyrtare e lajmeve e Sirisë, SANA.

Siria është gjithashtu e gatshme të ridislokojë forcat në Golan në përputhje me një marrëveshje të vitit 1974 për krijimin e një zone tampon “me kusht që forcat izraelite të tërhiqen menjëherë”, shtoi raporti.

Më 8 dhjetor, Izraeli dërgoi trupa në zonën tampon të demilitarizuar, kur qeveria e Asadit u rrëzua.

Në dhjetor, ministri izraelit për çështjet ushtarake, Israel Katz, urdhëroi ushtrinë që të "përgatitet të qëndrojë" në zonën tampon gjatë dimrit.

Të martën, ai tha se trupat izraelite do të qëndrojnë në majën e malit Hermon, i njohur si Jabal al-Shaykh në arabisht, dhe zonat përreth "për një kohë të pacaktuar".

Mali Hermon përshkon Sirinë dhe Libanin, me pamje nga lartësitë e pushtuara të Golanit.

Vëzhguesit besojnë se Izraeli ka përfituar nga vakumi i pushtetit i krijuar nga largimi i Asadit për të çuar përpara axhendën e tij territoriale, e cila përputhet me të ashtuquajturin projektin e "Izraelit të Madh".