Katari: Do ta rindërtojmë Gazën ndërkohë që palestinezët jetojnë aty
Vendet arabe po planifikojnë të rindërtojnë Gazën ndërkohë që palestinezët vazhdojnë të jetojnë aty, tha zëdhënësi i ministrisë së jashtme të Katarit, Majed Al Ansari.
“Ministrat arabë e bënë shumë të qartë, ne kemi planet tona për rindërtimin e Gazës, teksa palestinezët jetojnë aty”, tha ai.
“Unë nuk mendoj se tani është koha për të filluar komentimin e ideve specifike” -tha Ansari në përgjigje të një pyetjeje për zhvendosjen e palestinezëve nga Gaza gjatë rindërtimit të saj.
“Asnjë nuk mund ta bëjë i vetëm rindërtimin e Gazës, kjo duhet të jetë një përpjekje ndërkombëtare e udhëhequr nga vende si Shtetet e Bashkuara”, tha Ansari për planet e pasluftës për Gazën.
Më herët, një zyrtar arab i tha CNN se plani i Trump për të larguar palestinezët nga Gaza dhe për të marrë pronësinë e rripit të Gazës është “shqetësues”.
