Arabia Saudite po zhvillon luftë ekonomike ndaj Katarit

Një zyrtare e lartë e Katarit e ka përshkruar bojkotin diplomatik dhe tregtar të udhëhequr nga Arabia Saudite kundër vendit të saj si "luftë ekonomike", duke theksuar se Doha planifikon të kërkojë kompensim për ata që goditen nga sanksionet.

"Kjo është luftë ekonomike", tha zëdhënësja e Ministrisë së Jashtme të Katarit, Lulvah al-Khater në një konferencë shtypi të mërkurën. Khater tha se Katari "nuk do të lërë gur pa lëvizur" në ndjekjen ligjore të kërkesave për kompensimin e dëmeve të pësuara nga bizneset. "Ne kemi filluar të lëvizim ndërkombëtarisht për të kërkuar arbitrazh ose për të shkuar në gjykatat ndërkombëtare apo institucionet e OKB-së" për t'i dhënë fund bllokadës, tha ajo. "Të gjitha opsionet janë në dispozicion për ne," vuri në dukje Khater. Ajo vazhdoi duke thënë se zyrtarët e Katarit do të kontaktojnë Zyrën e Komisionerit të Lartë të Kombeve të Bashkuara për të Drejtat e Njeriut në Doha në procesin ligjor kundër bllokadës së udhëhequr nga Arabia Saudite. Zëdhënësja e Ministrisë së Jashtme të Katarit shprehu shpresën se Arabia Saudite dhe aleatët e saj do të angazhoheshin në dialog me qeverinë e Dohës për të ndihmuar në zgjidhjen e konfliktit të vazhdueshëm. Arabia Saudite, Emiratet e Bashkuara Arabe, Bahrejni dhe Egjipti ndërprenë lidhjet diplomatike me Katarin më 5 qershor të vitit të kaluar, pasi e akuzuan zyrtarisht atë për "sponsorizimin e terrorizmit".