Ansarallah sfidon sistemet amerikane Patriot

 Sulmet me raketa dhe sulmet me dron të lëvizjes popullore të Jemenit Ansarallah kanë theksuar qartë mungesën e efikasitetit të baterive të sistemeve raketore Patriot të dorëzuara nga Shtetet e Bashkuara në Arabinë Saudite, që ka buxhetin e tretë më të madh ushtarak në botë.

"Incidentet e fundit kanë treguar se mbrojtja ajrore e Arabisë Saudite nuk është në gjendje të ofrojë sigurinë ajrore për këtë vend", citon një zyrtar saudit gazeta amerikane Wall Street Journal. "Dy ushtarë sauditë u vranë në përleshjet me luftëtarët e Jemenit në kufirin midis Jemenit dhe Arabisë Saudite", njoftoi dje media e Arabisë Saudite. Duke kundërshtuar faktin se kjo ishte mënyra në të cilën u vranë këta dy ushtarë sauditë, Ansarallah njoftoi se kishte lëshuar një raketë balistike në pozicionet saudite në bazën Akafa në provincën Naxhran. Po të njëjtën ditë, gjenerali Jahja Saree, zëdhënës i forcave të armatosura të Jemenit, njoftoi se dronët jemenas kishin sulmuar aeroportet e qyteteve saudite Abha dhe Xhizan, duke bërë që fluturimet të pezulloheshin. "Forcat e armatosura jemenase po punojnë fuqishëm për të zhvilluar aftësitë e tyre të mbrojtjes për të ndaluar agresionin e udhëhequr nga Arabia Saudite dhe për të hequr bllokadën kundër Jemenit. Kjo bëhet në kuadrin e të drejtave tona legjitime për të mbrojtur veten, vendin tonë, popullin tonë, fenë tonë dhe dinjitetin tonë ", tha zyrtari i lartë ushtarak jemenas.