Damasku paralajmëron Ankaranë: "Do të dëbohesh nga Idlibi në rast sulmi"

Damasku e quajti qeverinë turke një "regjim ekspansionist", duke shtuar se Ankaraja do të konsiderohet një "grup terrorist" nëse guxon të sulmojë tokën siriane.

Sipas agjencisë zyrtare Siriane të lajmeve SANA, një zyrtar i Ministrisë së Jashtme Siriane tha të mërkurën (9 tetor) se Siria do të përdorte çdo mjet të mundshëm për të kundërshtuar agresionin e Ankarasë. "Siria dënon deklaratat absurde dhe objektivat armiqësore të regjimit turk, si dhe vendosjen masive të forcave ushtarake turke në kufirin sirian. Fakti që trupat turke po riorganizohen në kufirin sirian është një shkelje flagrante e ligjit ndërkombëtar dhe i rezolutave të Këshillit të Sigurimit që theksojnë respektimin e integritetit territorial dhe sovranitetit të Sirisë, "thuhet në një deklaratë të MPJ të Sirisë. "Sjellja armiqësore e regjimit të Erdoganit tregon ëndrrat ekspansioniste të Turqisë për Sirinë. Kjo është sjellje e pajustifikueshme dhe e papranueshme. Vendimi i Turqisë për të mos përmbushur angazhimet e saj në bazë të marrëveshjes së Adanasë dëshmon se regjimi turk në kundërshtim me pretendimet e tij, nuk kujdeset për sigurinë e kufijve sirianë, por synon të okupojë pjesë të territorit të Sirisë ", tha burimi i MPJ të Sirisë. Zyrtari sirian shprehu gatishmërinë e Sirisë për të kundërshtuar me të gjitha mjetet ligjore ofensivën turke, duke thënë se Damasku ishte gati të "mirëpresë ata që lejuan veten të mashtrohen"."Nëse regjimi i Erdoganit sulmon Sirinë, ai do të trajtohet si një terrorist dhe padyshim që do të humbasë rolin e tij si garantues i zbatimit të Marrëveshjes së Astanasë. Turqia do të humbasë rolin e saj në Idlib dhe do të dëbohet nga ky rajon", tha zyrtari sirian.