Greqia kundërshton bisedimet derisa Turqia të tërheqë anijen nga Mesdheu

Greqia thotë se nuk ka në plan të zhvillojë bisedime me Turqinë për zbutjen e tensioneve në Mesdheun lindor nëse Ankaraja nuk tërheq një anije kërkimore nga zonat e diskutueshme.

Turqia dhe Greqia, të dy anëtarë të NATO-s, kanë qenë prej kohësh në mosmarrëveshje për të drejtat e kërkimit të naftës dhe gazit në Mesdheun lindor. "Greqia nuk do të ulet në tryezë për bisedime ndërsa anija eksploruese Oruc Reis dhe anijet luftarake shoqëruese janë atje," tha të Martën Ministri i Shtetit i Greqisë George Gerapetritis në një intervistë me radion kombëtare, Parapolitika. Gerapetritis shtoi se Athina do të ngrinte "prerazi" mosmarrëveshjen në një takim të Këshillit Evropian duke filluar të Enjten. Njoftimi të martën prishi shpresat e ngritura mbi një marrëveshje të arritur midis Turqisë dhe Greqisë muajin e kaluar për të filluar bisedimet, pas përpjekjeve diplomatike të drejtuara nga Gjermania për të lehtësuar tensionet. Bisedimet ishin bllokuar që nga viti 2016 dhe pritja ishte për rinisjen e tyre në qytetin turk të Stambollit, por asnjë datë e saktë nuk ishte specifikuar. Më herët gjatë ditës, Ministri i Jashtëm gjerman Heiko Maas i bëri thirrje Turqisë të përmbahet nga "provokimet" në Mesdheun lindor. "Ankaraja duhet të përfundojë bashkëveprimin midis vetpërmbajtjes dhe provokimit nëse qeveria është e interesuar në bisedime, siç ka pohuar vazhdimisht," tha Maas në Berlin, përpara fluturimit të tij në Greqi dhe Qipro.