Ghebreyesus: Bota mund ta vërë nën kontroll pandeminë brenda disa muajve

Bota mund ta vërë nën kontroll pandeminë globale COVID-19 në muajt e ardhshëm, por me kusht që ajo të shpërndajë burimet e nevojshme në mënyrë të drejtë, tha kreu i Organizatës Botërore të Shëndetësisë (OBSH), Tedros Adhanom Ghebreyesus.

“Ne kemi mjetet për ta sjellë këtë pandemi nën kontroll brenda disa muajsh, nëse i zbatojmë ato në mënyrë të qëndrueshme dhe të barabartë”, tha kreu i OBSH-së, Ghebreyesus, raporton Reuters. Sidoqoftë, ai gjithashtu shprehu shqetësim për “shkallën alarmante” në të cilën COVID-19 po përhapet tek mosha 25-59 në mbarë botën, ndoshta për shkak të varianteve shumë më ngjitëse. “U deshën nëntë muaj për të arritur një milion vdekje; 4 muaj për të arritur dy milionë dhe 3 muaj për të arritur tre milionë”, shtoi ai. Ndryshe, 141 milionë njerëz në mbarë globin janë infektuar me virus gjersa kanë vdekur 3.01 milionë njerëz.