Cristiano Ronaldo kthehet tek Manchester United
Klubi anglez i futbollit "Manchester United" njoftoi të premten në mbrëmje se ka arritur një marrëveshje me "Cristiano Ronaldo", superyllin portugez 36-vjeçar të skuadrës italiane "Juventus", për t'u rikthyer në "Old Trafford".
Merr menjëherë rrugën zyrtare transferimi i Cristiano Ronaldos. Sulmuesi portugez që konfirmoi largimin nga Juventusi, ishte drejt Man. Cityt por në pak orë ndryshoi gjithçka duke u rikthyer zyrtarisht në shtëpinë e tij të parë të madhe, Man. United. “Djajtë e kuq” ndërhynë menjëherë duke ia hequr ish yllin e tyre rivalëve të Man. City ndërsa njoftuan edhe arritjen e marrëveshjes me Juventusin për kartonin e tij. 28 mln euro Euro ishte kërkesa e Juventusit e cila u plotësua ndërsa nuk vonoi as ajo mes lojtarit dhe Man. United. Tashmë Ronaldo rikthehet pas 12 vjetësh për të veshur fanellën e Man. United me të cilët fitoi gjithçka, titull kampion, Champions League, FA Cup dhe çmimet individuale në Angli ku në 292 ndeshje arriti të shënonte 118 herë. Siç mësohet, ishte legjenda Alex Ferguson, ish trajneri që e bëri lojtar të madh Ronaldon, ai që ka ndërhyrë në negociatat dhe për ta bindur atë që të mos shkojë te Man. City por të rikthehet në “shtëpinë” e tij në “Old Trafford”. Tifozët e “djajve të kuq” nuk e kanë harruar asnjëherë Ronaldon dhe tashmë do ta kenë sërish në stadiumin e tyre dhe vetëm disa proçedura rutinë si teste mjekësore dhe firma e ndajnë nga debutimi në teatrin e futbollit.
